Ալիևը ցանկանում է Եվրոպա էլեկտրաէներգիա մատակարարել գոյություն չունեցող միջանցքով

Եվրոպայում ադրբեջանական գազի պահանջարկն աճում է, և արտահանման ծավալներն ավելացնելու համար անհրաժեշտ է լուծել ենթակառուցվածքների ընդլայնման հետ կապված խնդիրները։ Ադրբեջանական լրատվամիջոցների փոխանցմամբ՝ այս մասին հայտարարել է Ադրբեջանի նախագահ Իլհամ Ալիևը։

«Ադրբեջանական գազի պահանջարկը արագ տեմպերով աճում է։ Սակայն գազի պոտենցիալ գնորդները  պետք է հասկանան, որ  մեկ տարվա ընթացքում հնարավոր չէ էականորեն ավելացնել արդյունահանումն ու արտահանումը։ Պետք են պայմանագրեր, ուստի պետք է արագացնել բանակցությունները։ Մենք նաև պետք է ավելացնենք արտադրությունը և ընդլայնենք առկա արտահանման ենթակառուցվածքը»,-ասել է Ալիևը Բաքվի էներգետիկ շաբաթի բացման իր խոսքում։

Նրա խոսքով, TAP-ի բաժնետերերը, որի հզորությունը կազմում է 10 միլիարդ խորանարդ մետր, քննարկում են դրա թողունակությունն ավելացնելու հնարավորությունը՝ ադրբեջանական գազի մեծ պահանջարկի պատճառով։ Բացի այդ, ըստ Ադրբեջանի նախագահի,  կարելի է քննարկել նաև TANAP գազատարի հզորությունների ընդլայնումը (ներկայիս հզորությունը կազմում է տարեկան 16 մլրդ խմ),քանի որ գազի պահանջարկ կա։

Սակայն, Ալիևը նշել է, որ միայն Ադրբեջանի ջանքերը բավարար չեն ու ներդրումներ ու ֆինանսավորում խնդրել միջազգային գործընկերներից։

«Եվրոպայում ենթակառուցվածքներում ներդրումներ պետք է լինեն, պայմանագրերի առկայություն։ Միաժամանակ, մենք ամեն ինչ անելու ենք գործընթացն արագացնելու համար»,- ասել է նա՝հույս հայտնելով, որ միջազգային առաջատար ֆինանսական ինստիտուտները կաջակցեն արտահանման ենթակառուցվածքների ընդլայնման ծրագրերին։

Նա նաև նշել է, որ Ադրբեջանը ցանկանում է ոչ միայն դեպի Եվրոպա գազի արտահանման ավելացում, այլև  պլանավորում է էլեկտրաէներգիայի արտահանել, այն էլ գոյություն չունեցող միջանցքով։

«Դրա համար մենք ցանկանում ենք ակտիվանցենլ «Զանգեզուրի միջանցքը», որը կարող է դառնալ ոչ միայն ապրանքների, այլև էլեկտրաէներգիայի փոխադրման կարևոր տրանսպորտային երթուղի։ Մենք աշխատում ենք դրա շուրջ ու արդեն անցել ենք գործնական ներդրումների։ Ես հավատում եմ, որ նրանք, որոնք թերագնահատում են Ադրբեջանի հուսալի տարանցիկ ներուժը, այժմ կփոխեն իրենց կարծիքը»,-ասել  է Ալիևը։

Ուշագրավ է, որ չնայած Ալիևի պնդումներին, մայիսի 22-ին Բրյուսելում կայացած  Հայաստանի, Ադրբեջանի ու ԱՄ ղեկավարների հանդիպման մասին ԵԽ նախագահ Շառլ Միշելի տարածած հաղորդագրության մեջ հստակ նշվում է, որ տարածաշրջանի ապաշրջափակման համատեքստում ՀՀ-ն ու Ադրբեջանը հաստատել են, որ ապագա տրանսպորտային ենթակառուցվածքների հետ կապված արտատարածքային պահանջներ չունեն։ «Կապի հնարավորությունները հատուկ քննարկվել են մայիսի 22-ին Բրյուսելում՝ տարածաշրջանի ապաշրջափակման հնարավորությունները զարգացնելու նպատակով: Այս համատեքստում երկու կողմերը հաստատել են, որ ապագա տրանսպորտային ենթակառուցվածքների հետ կապված արտատարածքային պահանջներ չկան: Հակառակի շահարկումները ցավալի են»,- ասվում է ԵԽ նախագահ Շառլ Միշելի տարածած հայտարարության մեջ։

Էմմա Չոբանյան