Թուրքիայում մարդկանց շուրջ 80%-ը դժվարություններ ունի հիմնական կարիքները բավարարելու հարցում․ հետազոտություն

Թուրքիայում, ըստ MetroPoll ընկերության ապրիլյան հարցման արդյունքների, բնակչության ճնշող մեծամասնությունը վերջին երկու տարում աղքատացել է, գրում է Bianet-ը։

Նշվում է, որ Թուրքիայում բնակչության 36 տոկոսը չի կարողանում իր հիմնական կարիքները բավարարել և 43,7 տոկոսը կարող է միայն ամենաառաջնային կարիքները բավարարել, ինչպիսիք են սնունդն ու կացարանը։ Մարդկանց մասնաբաժինը, որոնք ասել են, որ չեն կարող բավարարել իրենց հիմնական կարիքները, 2020 թվականի ապրիլին կազմել է 24,2 տոկոս։ Միայն 19,6 տոկոսն է ասել, որ  կարող է հեշտությամբ բավարարել բոլոր հիմնական կարիքները․ երկու տարի առաջ այս ցուցանիշը կազմում էր 26 տոկոս:

Նշվում է, որ հանրության ավելի քան 60 տոկոսը կառավարությանն է պատասխանատու համարում տնտեսական բարդությունների համար։ Իշխող «Արդարություն և զարգացում» կուսակցության ընտրողների 25,8 տոկոսը կարծում է, որ կառավարությունն է պատասխանատու ճգնաժամի համար, մինչդեռ 49,3 տոկոսը մեղադրում է «օտար ուժերին», 16,5 տոկոսը՝ ընդդիմությանը։ ԱԶԿ-ի գործընկեր «Ազգայնական շարժում» կուսակցության ընտրողների 47,4 տոկոսը ճգնաժամի համար պատասխանատու է համարում արտաքին ուժերին:

Բոլոր ընտրողների շրջանում 62,3 տոկոսը կարծում է, որ կառավարությունն է պատասխանատու ճգնաժամի համար, ըստ  23,8 տոկոսի՝ ճգնաժամի պատճառ են դարձել արտաքին ուժերը:

Նրանց մասնաբաժինը, որոնք ասում են, որ անցած տարվա ընթացքում տնտեսական իրավիճակը վատացել է, զգալիորեն ավելի մեծ է ընդդիմադիր ընտրողների շրջանում՝ համեմատած իշխող ուժի ընտրողների հետ․ դա կազմում է հիմնական ընդդիմադիր Ժողովրդահանրապետական կուսակցության, նրա դաշնակից İYİ և Ժողովուրդների դեմոկրատական կուսակցությունների ընտրողների մոտ 90 տոկոսը։

Բոլոր ընտրողների շրջանում 70,8 տոկոսն ասել է, որ իրենց վիճակը վատացել է, 21,9 տոկոսը՝ չի փոխվել, իսկ ահա 3,4 տոկոսի կարծիքով՝ լավացել է:

Էմմա Չոբանյան