29.07.2026 | 00:56
«Արարատ-Արմենիան» դուրս եկավ Չեմպիոնների լիգայի որակավորման երրորդ փուլ. ՏԵՍԱՆՅՈՒԹ
Մակրոնը ցանկացավ ցույց տալ, որ Ֆրանսիան, Եվրամիությունը կամք ունեն՝ օգնելու Հայաստանին փրկել իր ինքնիշխանությունը․ Կայծ Մինասյան․ ՏԵՍԱՆՅՈՒԹ
Քաղաքականություն
10.03.2022 | 21:47
Ֆրանս-հայկական հանդիպումը տեղի ունեցավ գլխավորապես ինքնիշխանության պահպանման թեմայի շուրջ։ Factor TV-ի հետ զրույցում այս մասին ասաց ֆրանսահայ քաղաքագետ Կայծ Մինասյանը՝ անդրադառնալով Փարիզում կայացած Փաշինյան-Մակրոն հանդիպմանը։
«Այդ հանդիպումը տեղի ունեցավ Ուկրաինայի պատերազմի և Կովկասում ստեղծված լարվածության ընթացքում։ Հայաստանը, Ռուսաստանի դաշնակից լինելով, ՄԱԿ-ի Անվտանգության խորհրդում ձեռնպահ քվեարկեց Ուկրաինային վերաբերող բանաձևին։ Ֆրանսիան, որը և՛ Ուկրաինայի, և՛ Հայաստանի հետ մտերիմ է, ինքնաբերաբար Հայաստանի հետ այս մթնոլորտում պիտի քննարկեր ինքնիշխանության հարցը։ Գիտենք, որ Ուկրաինայի ինքնիշխանությունը վտանգված է։ Հարց է հիմա՝ արդյո՞ք վտանգված է նաև մյուս հետխորհրդային երկրների ինքնիշխանությունը»,- հավելեց նա։
Կայծ Մինասյանն անդրադարձավ «Հավակնություններ․ Հայաստան-Ֆրանսիա» համաժողովին Ֆրանսիայի նախագահ Էմանուել Մակրոնի հայտարարությանը, որ «Ռուսաստանը պատերազմ է բերել Եվրոպա, և որ այդ պատերազմն իր հետևանքներն է ունենալու Հայաստանի ու նաև ամբողջ տարածաշրջանի վրա»։ Ըստ քաղաքագետի՝ նախագահը, որպես նաև Եվրամիությունում նախագահող, ներկայացրեց իրենց պատրաստակամությունը՝ աջակցելու հետխորհրդային երկրներին։
«Նա ցանկացավ ցույց տալ, որ ինքը, Եվրամիությունը կամք ունեն՝ օգնելու հետխորհրդային երկրներին փրկել իրենց ինքնիշխանությունը։ Անվտանգության մասին չէ խոսքը, այլ հենց ինքնիշխանության»,- նշեց Մինասյանը։
Ֆրանսահայ քաղաքագետի խոսքով՝ նկատելի է, որ Ֆրասիան և, ընդհարապես, Եվրամիությունը ցանկանում են հավասարակշռություն պահպանել Հայաստանի և Ադրբեջանի միջև։
«Գիտենք, որ հիմա Ադրբեջանն ավելի կարևոր դեր է խաղում ոչ միայն պատերազմում հաղթելու պատճառով, այլ նաև նրա համար, որ տարածաշրջանում գլխավոր տնտեսական խաղացողն է։ Գիտենք, որ Ադրբեջանը հիմա ունենալու է հնարավորություն՝ ավելի մեծ քանակով գազ վաճառել Եվրոպային։ Կարծում եմ, որ Ֆրանսիան ցանկանում է հավասարակշռությունը պահել։ Դրա համար էլ համաժողովի ժամանակ շեշտը դրել էր տնտեսական հարցի վրա։ Ցանկանում է այդպես միջնորդ լինել Հայաստանի և Ադրբեջանի միջև»,- նկատեց նա։
Մանրամասները՝ տեսանյութում։
Հռիփսիմե Հովհաննիսյան
