Հաագայում սկսվել է Ուկրաինան ընդդեմ ՌԴ-ի գործի քննությունը

ՄԱԿ-ի Միջազգային դատարանը սկսել է Ռուսաստանի դեմ Ուկրաինայի հայցի լսումները՝ ցեղասպանության մեղադրանքի գործով։ Այս մասին հայտնել է Ուկրաինայի ԱԳՆ-ն, գրում է Korrespondent-ը։

«Մարտի 7-ին Ուկրաինայի նախագահ Վլադիմիր Զելենսկիի անունից Ուկրաինայի պատվիրակությունը ներկայացնում է իր իրավական դիրքորոշումը Ռուսաստանի դեմ գործում՝ համաձայն ՄԱԿ-ի Միջազգային դատարանում 1948 թվականի Ցեղասպանության հանցագործության կանխարգելման և պատժի մասին կոնվենցիայի»,- ասված է հաղորդագրության մեջ։

ԱԳՆ-ն հիշեցրել է, որ Երկրորդ համաշխարհային պատերազմից հետո միջազգային հանրությունը միավորվել է՝ ճանաչելու երկու հիմնարար սկզբունքներ՝ ինքնիշխան պետությունների պաշտպանությունն ագրեսիայից և մարդկանց պաշտպանությունը մարդու իրավունքների կոպիտ խախտումներից, մասնավորապես՝ ցեղասպանության իրականացումից։

«Ռուսաստանը շահարկում է միջազգային իրավունքը և, մասնավորապես, վերոհիշյալ կոնվենցիան, որը հիմնարար միջազգային պայմանագիր է մարդու իրավունքների պաշտպանության ոլորտում և օգտագործվել է Ուկրաինայի դեմ զինված ագրեսիայի համար»,- հայտնել են Ուկրաինայի ԱԳՆ-ից։

Ուկրաինայի պատվիրակությունը դիմում է ՄԱԿ-ի միջազգային դատարան՝ խնդրանքով գործով կիրառել հետևյալ կանխարգելիչ միջոցները՝ արյունահեղությունը դադարեցնելու համար․

-Ռուսաստանի Դաշնությունը պետք է անհապաղ դադարեցնի ռազմական գործողությունները, որոնք սկսվել են 2022 թվականի փետրվարի 24-ին Ուկրաինայի տարածքում։

-Ռուսաստանի Դաշնությունը պետք է անհապաղ ապահովի, որ իր վերահսկողության կամ ազդեցության տակ գտնվող ցանկացած ռազմական և այլ զինված ստորաբաժանումներ դադարեցնեն մասնակցությունը ռազմական գործողություններին։

Հաագայի դատարանում Ուկրաինան ընդդեմ Ռուսաստանի գործով լսումները տեղի կունենան մարտի 7-8-ը։

Տաթև Ֆռանգյան