Գերմանիայում ադրբեջանցի քաղաքական միգրանտները բողոքում են իրենց արտահանձնման դեմ

Գերմանիայում բնակվող ադրբեջանցի քաղաքական միգրատները բողոքի ակցիա են անցկացրել Գելզենկիրխեն քաղաքի վարչական դատարանի և Ռեկլինգհաուզենի օտարերկրացիների հետ աշխատանքի քաղաքային գրասենյակի դիմաց, հայտնում են ադրբեջանական լրատվամիջոցները։  

DAS («Ընտրիր դեմոկրատական ​​Ադրբեջանը») կազմակերպության ներկայացուցիչ, ակցիաների կազմակերպիչ Ալիշ Աբդուլաևը լրատվամիջոցներին ասել է, որ ակցիաներն անցկացվել են «Քաղաքական ակտիվիստներին բռնապետական ​​ռեժիմների զոհերի մի՛ վերածեք» կարգախոսով։

Ակցիայի մասնակիցները բողոքել են Ադրբեջանում DAS-ի անդամ Ջաֆար Միրզոևի ձերբակալման դեմ, որին 2021թ․ նոյեմբերի 25-ին արտաքսել են Գերմանիայից, իսկ այս տարվա հունվարին նա Ադրբեջանում կալանավորվել է։ Միրզոևին մեղադրում են, իբր, թմրանյութերի ապօրինի շրջանառության մեջ։ Նշվում է, որ ձերբակալությունից հետո նա ենթարկվել է խոշտանգումների, նրան սպառնում է մինչև 12 տարվա ազատազրկում։

Աբդուլաևի խոսքով՝ Միրզոևը մասնակցել է DAS-ի բոլոր բողոքի ակցիաներին և սուր քննադատության ենթարկել Ադրբեջանի քաղաքական ռեժիմին։ 

Ակցիայի մեկ այլ կազմակերպիչ՝ Նուրլան Ռասուլովն էլ ասել է, որ քաղաքական այլ ակտիվիստները, որոնք արտաքսվել են Գերմանիայից՝ Մալիք Ռզաևը, Մութալիմ Օրուջևը և Փյունխան Քարիմլին, նույնպես մեղադրվում են թմրամիջոցների ապօրինի շրջանառության մեջ։

«Սա հաստատում է, որ նրանք բոլորը ձերբակալվել են քաղաքական դրդապատճառներով՝ Ադրբեջանի իշխանություններին քննադատելու համար։ Ակտիվիստների կալանավորումներն ու խոշտանգումները ոչ միայն հաստատում են Ադրբեջանում մարդու իրավունքների խախտումը, դրանք նաև խոսում են Գերմանիայի կառավարության պատասխանատվության մասին՝ իր միջազգային պարտավորությունների հետ կապված»,- ասել է Ռասուլովը։

DAS-ի անդամ Ռովշան Ջաբբարովն էլ հայտնել է, որ ցուցարարների բողոքները փոխանցվել են Գելզենկիրխենի վարչական դատարան և Օտարերկրացիների հետ աշխատանքի Ռեկլինգհաուզենի քաղաքային գրասենյակ։

Ցուցարարները կարծում են, որ Գերմանիայի ԱԳՆ-ն պետք է մեծացնի ուշադրությունը մարդու իրավունքների ուղղությամբ և միջոցներ ձեռնարկի՝ Ադրբեջանում ձերբակալված քաղաքական միգրանտներին ազատ արձակելու համար։ Այդ նպատակով պետք է նաև ճնշում գործադրել  Բաքվի վրա։

Էմմա Չոբանյան