15.01.2025 | 23:34
Իսրայելն ու ՀԱՄԱՍ-ը հրադադարի համաձայնագիր են ստորագրել
ԱՄՆ Սենատը բանաձև է ընդունել ի պաշտպանություն Ուկրաինայի
Քաղաքականություն
18.02.2022 | 13:42
ԱՄՆ Սենատը փետրվարի 17-ին միաձայն կողմ է քվեարկել «անկախ Ուկրաինային վճռական աջակցության և ռուսական ռազմական ագրեսիայի դատապարտման օգտին», հայտնում է Associated Press-ը։
Նշվում է, որ այս բանաձևն օրենքի ուժ չունի, սակայն պաշտոնապես հայտարարում է «ԱՄՆ-ի անսասան աջակցությունն ապահով, ժողովրդավարական և անկախ Ուկրաինային» և «դատապարտում է ռուսական ռազմական կուտակումները» Ուկրաինայի հետ սահմանին։
Քվեարկությունն անցել է միաձայն՝ առանց առարկությունների կամ պաշտոնական անվանական կոչերի:
«Սենատը միասնական է Ուկրաինայի անկախությանն ու ինքնիշխանությանն աջակցելու հարցում»,- ասել է Օհայո նահանգից սենատոր Ռոբ Փորթմանը։
Նշվում է, որ բանաձևը կոչ է անում ԱՄՆ նախագահ Ջո Բայդենին ստիպել ԱՄՆ կառավարությանը՝ սպառել բոլոր հասանելի գործիքները՝ Ռուսաստանին «զգալի ծախսեր» պարտադրելու և «Եվրոպայում խաղաղությունը վերականգնելու համար»։
Ամբողջ շաբաթվա ընթացքում սենատորները փորձում էին արձագանքել տարածաշրջանում աճող լարվածությանը, նրանցից շատերը ձգտում էին ավելի հեռուն գնալ՝ պատժամիջոցներ սահմանելով Ռուսաստանի նախագահ Վլադիմիր Պուտինի դեմ:
Սակայն դիվանագիտական ջանքերի ֆոնին սենատորները ձեռնպահ մնացին պատժամիջոցներ ձեռնարկելուց՝ հենվելով Սպիտակ տան ռազմավարության վրա։
2021 թվականի երկրորդ կեսին Ռուսաստանը Ղրիմում և Ուկրաինայի հետ սահմանին տեղակայել է ավելի քան 100․000 զինծառայողների՝ պատճառաբանելով ռազմական զորավարժություններով։ Սակայն արևմտյան երկրների առաջնորդները մտահոգություն ունեն, որ Մոսկվան պատրաստվում է պատերազմի։
Կրեմլը հերքում է Ուկրաինա ներխուժելու մտադրություններն ու Արևմուտքին մեղադրում Կիևին զինելու և ռուսական սահմանին զորավարժություններ անելու մեջ։ Հունվարին տեղի ունեցած երկկողմ բանակցություններն արդյունք չեն տվել։ Արևմտյան գերտերությունները Ռուսաստանին կոչ են անում Ուկրաինայի հետ սահմանից հետ քաշել զորքերը և սպառնում են աննախադեպ կոշտ պատժամիջոցներով։
Ի պատասխան՝ Ռուսաստանը 2021 թվականի դեկտեմբերին անվտանգության երաշխիքների խնդրով պայմանագրերի նախագծեր է ներկայացրել ԱՄՆ-ին և ՆԱՏՕ-ին: Դրանից հետո տեղի են ունեցել բանակցություններ, որոնք նույնպես նշանակալից արդյունք չեն ապահովել: Միացյալ Նահանգները և ՆԱՏՕ-ն Ռուսաստանին փոխանցել են այդ երաշխիքների շուրջ պատասխաններ, որոնք Մոսկվան բացասական է գնահատել։ Ռուսաստանի առանցքային պահանջներից մեկն այն է, որ Ուկրաինան և Վրաստանը երբևէ չմիանան ՆԱՏՕ-ին: Մինչդեռ, ըստ ԱՄՆ-ի և ՆԱՏՕ-ի, Ռուսաստանին ՆԱՏՕ-ի ընդլայնման հարցերին միջամտելու իրավունք վերապահված չէ:
Տաթև Ֆռանգյան
