Մի շարք երկրներ կոչ են անում իրենց քաղաքացիներին լքել Ուկրաինայի տարածքը

Ուկրաինայի շուրջ իրադրության լարման հետևանքով վերջին օրերին տարբեր երկրներ կոչ են անում իրենց քաղաքացիներին լքել Ուկրաինայի տարածքը։

Շվեյցարիայի արտաքին գործերի նախարարությունը խորհուրդ է տվել իր քաղաքացիներին զերծ մնալ Ուկրաինա զբոսաշրջային կամ այլ այցերից, որոնք որոնք հրատապ բնույթ չունեն:

Իսպանիայի իշխանությունները խորհուրդ են տվել իրենց քաղաքացիներին ժամանակավորապես լքել Ուկրաինան` hաշվի առնելով անվտանգության հետ կապված փոփոխական իրավիճակը: Ուկրաինայում գտնվող իսպանացիներին խորհուրդ է տրվում օգտվել հասանելի կոմերցիոն միջոցներից։

Իտալիայի ԱԳՆ ճգնաժամային կենտրոնը ևս կոչ է արել Ուկրաինայում իր քաղաքացիներին լքել Ուկրաինան:

Իրաքի իշխանությունները, անվտանգության նկատառումներից ելնելով, կոչ են արել քաղաքացիներին լքել Ուկրաինայի տարածքը, իսկ Կիևում դեսպանատան աշխատակիցներին՝ օգտվել ամենամյա արձակուրդից:

Բելգիայի ԱԳՆ-ն Ուկրաինայի տարածքում գտնվող իր քաղաքացիներին խորհուրդ է տվել լքել երկիրը: Բելգիայի ԱԳՆ-ն նաև զգուշացնում է քաղաքացիներին, որ Ուկրաինայում իրավիճակի վատթարացման դեպքում տարհանումը չի կարող երաշխավորվել, ուստի խորհուրդ է տրվում լքել երկիրը, քանի դեռ դա հնարավոր է։

Գերմանիայի արտաքին գործերի նախարարությունը կոչ է արել իր քաղաքացիներին լքել Ուկրաինան, եթե այդ երկրում նրանց գտնվելը պարտադիր չէ:

Քուվեյթի իշխանությունները, անվտանգության նկատառումներից ելնելով, կոչ են արել իրենց քաղաքացիներին լքել Ուկրաինայի տարածքն ու խուսափել այդ երկիր այցելելուց:

Նոր Զելանդիայի արտաքին գործերի նախարարությունը հորդորել է իր քաղաքացիներին շտապ լքել Ուկրաինայի տարածքը։

Ավստրալիայի վարչապետ Սքոթ Մորիսոնը Ուկրաինայում ստեղծված իրավիճակը «շատ վտանգավոր» է անվանել ու ևս դիմել է իր քաղաքացիներին՝ կոչ անելով շտապ լքել Ուկրաինայի տարածքը։

Վրաստանի արտաքին գործերի նախարարությունը Ուկրաինայում իրավիճակի հետագա սրման մեծ հավանականության պատճառով հայտնում է, որ Կիևի դեսպանատունը, Օդեսայի և Դոնեցկի հյուպատոսություններն անցնում են աշխատանքի արտակարգ ռեժիմի։ Հաշվի առնելով ստեղծված իրավիճակը՝ Վրաստանի ԱԳՆ-ը հորդորում է Վրաստանի քաղաքացիներին կապի մեջ մնալ Վրաստանի դեսպանատան հետ, ինչպես օպերատիվ տեղեկատվություն ստանալու, այնպես էլ նյութատեխնիկական ու տեղեկատվական աջակցություն ստանալու համար։

Ուկրաինայի շուրջ իրադրության լարման հետևանքով ԱՄՆ-ը, Բրիտանիան, Ֆրանսիան, Կանադան, Նիդերլանդները, Ճապոնիան ևս կոչ էին արել իրենց քաղաքացիներին խուսափել այցելել այդ երկիր, իսկ արդեն ուկրաինական տարածքում գտնվողներին՝ լքել այն: