05.03.2026 | 15:05
Ինչու է ոստիկանությունը հսկում Մասյացոտնի թեմը. Փաշինյանի պարզաբանումը․ ՏԵՍԱՆՅՈՒԹ
Պեկինի Օլիմպիական խաղերում քաղաքականությունը, տնտեսությունը և մարզական կրքերը․ VOA-ի անդրադարձը
Քաղաքականություն
03.02.2022 | 23:01
Պեկինի օլիմպիական խաղերին մասնակցում են 91 երկրներ՝ ընդհանուր առմամբ 109 իրադարձություններով՝ 15 մարզաձևերում, գրում է «Ամերիկայի ձայն»-ը։
Ինչպես «Ասոշիեյթեդ փրես» գործակալությունն է հայտնում, Պեկինում օլիմպիական պաշտոնյաները խիստ կանոններ են սահմանել՝ կանխելու Covid-ի տարածումը։ Հանրությանը տոմսեր չեն վաճառվելու. Պեկինը հայտարարել է «փակ օղակի» համակարգի մասին, որտեղ մարզիկները և Օլիմպիական խաղերում ներգրավված այլ անձինք կաշխատեն, կմրցեն, կսնվեն և կքնեն՝ առանց լայն հասարակության հետ շփվելու: Պատվաստված բոլոր մասնակիցները կարող են ազատ տեղաշարժվել խաղերի հետ կապված տարածքներում հատուկ տրանսպորտային համակարգով: Չպատվաստված մարզիկները խաղերին ընդառաջ պետք է 21 օր անցկացնեն կարանտինում։ Ներքին և միջազգային մասնակիցները թեստավորվելու են ամեն օր։
Բայց COVID-19-ը Պեկինի Օլիմպիական խաղերի միակ խոչընդոտը չէ: Ըստ Washington Post-ի՝ միջազգային ակտիվիստների կոալիցիան ճնշում է գործադրել բոյկոտելու այն, ինչը նրանք անվանում են «#2022Ցեղասպանության Օլիմպիական խաղեր»՝ պատճառաբանելով Չինաստանի քաղաքականությունն ընդդեմ ույղուրների և այլ էթնիկ փոքրամասնությունների:
Ինչպես ԱՄՆ-ի Սպիտակ տան մամուլի քարտուղար Ջեն Սաքին է ասել. «Բայդենի վարչակազմը չի ուղարկի որևէ դիվանագիտական կամ պաշտոնական ներկայացուցչություն Պեկին 2022-ի ձմեռային օլիմպիական և պարալիմպիկ խաղերին՝ հաշվի առնելով ՉԺՀ-ի կողմից շարունակվող ցեղասպանությունը, մարդկության դեմ Սինցզյանում հանցագործությունները և մարդու իրավունքների այլ խախտումներ»:
Չինաստանի արտաքին գործերի նախարարության խոսնակ Վան Վենբինը քննադատել է Պեկինի Օլիմպիական խաղերի քաղաքականացումը։
«Սպորտը քաղաքականության հետ կապ չունի. Օլիմպիական խաղերը հիանալի հավաք են բազմաթիվ մարզիկների և մարզասերների համար, այլ ոչ թե քաղաքական դիրքորոշման բեմահարթակ»:
Ինչպես Սմիթ քոլեջի տնտեսագիտության պրոֆեսոր Էնդրյու Զիմբալիսն է zoom-ի միջոցով ասում, «Աշխարհի երկրներն ու բազում ընկերություններ հսկայական ներդրումներ ունեն այս խաղերում, և ցանկանում են, որ Օլիմպիական խաղերը լավ անցնեն:
Զիմբալիստը, որը մի քանի գիրք է հրատարակել Օլիմպիական խաղերի տնտեսագիտության վերաբերյալ, նշում է, որ Չինաստանը մեծ ազդեցություն ունի միջազգային շուկաներում, որտեղ չեն ցանկանում փչացնել Պեկինի հետ իրենց հարաբերությունները:
Վերլուծաբանների խոսքերով, հեռուստադիտողների մեծ մասը քաղաքական մտածելակերպ չի ցուցաբերում Օլիմպիական խաղերի ընթացքում: Նրանք այդ օրերին կենտրոնանում են սպոտային միջոցառումների, մրցապայքարի, իրենց սիրած մարզիկներին ու թիմերին երկրպագելու գործի վրա:
