Ռուսաստան-ՆԱՏՕ ճգնաժամը Թուրքիայի համար «կրիտիկական թեստ է»․ վերլուծաբան

Ուկրաինան ծառայում է որպես «կրիտիկական թեստ» Թուրքիայի համար, որը հայտնվել է ՌԴ-ի և Արևմուտքի միջև նոր հավասարակշռություն հաստատելու դիրքում։ Այս մասին գրում է Carnegie Europe-ի վերլուծաբան Մարկ Պիերինին, փոխանցում է «Ահվալ» գործակալությունը։

Վերլուծաբանը նշում է, որ Անկարան, ամենայն հավանակությամբ, կօգտագործի ռուս-ուկրաինական ճգնաժամը՝ ի ցույց դնելու իր ռազմական հնարավորությունները, ինչպես նաև քաղաքական հարաբերությունները և՛ Արևմուտքի, և՛ Ռուսաստանի հետ, սակայն՝ ոչ առանց «միջազգային հարթակում ռիսկերի»։

Նշվում է, որ Ռուսաստանը ռազմական տեխնիկա և ավելի քան 100․000-անոց զորք է տեղակայել Ուկրաինայի մոտ և շարունակում է զորքեր կուտակել՝ ավելացնելով ճնշումը ՆԱՏՕ-ի վրա։ ՆԱՏՕ-ի անդամ Թուրքիան էլ կապեր է պահպանում երկու երկրների հետ։

Անկարան Ռուսաստանից գնել է C-400 հակաօդային պաշտպանության համակարգեր և Ուկրաինային վաճառել Bayraktar TB2 անօդաչու թռչող սարքեր, ինչը Մոսկվայում զայրույթով է ընդունվել: Միաժամանակ, Անկարան առաջարկել է ծառայել որպես հակամարտության միջնորդ Մոսկվայի և Կիևի միջև։

Պիերինին գրում է, որ Անկարայի որոշումներն ուշադրությամբ դիտարկվելու են Մոսկվայում, Վաշինգտոնում, Բրյուսելում, եթե Ուկրաինա-Ռուսաստան ճգնաժամը սրվի։ Նա նաև վկայակոչում է Ուկրաիայի կողմից թուրքական «Բայրաքթար»-ների օգտագործումը, Թուրքիայի հնարավոր մասնակցությունը ՆԱՏՕ-ի կողմից Ռուսաստանի դեմ պատժամիջոցներին:

Ըստ վերլուծաբանի՝ Մոսկվայի հնարավոր քայլերը կարող են ներառել գործողություններ Ուկրաինայի կողմից օգտագործվող թուրքական արտադրության սարքերի դեմ, Թուրքիայի նկատմամբ տնտեսական հակապատժամիջոցները և Սիրիայում կոշտ դիրքորոշումը, որտեղ երկու երկրները պաշտպանում են հակառակ կողմերին։

Ըստ վերլուծաբանի՝ ՆԱՏՕ-ի դաշնակիցների դեպքում Անկարան դեռ պետք է լուծի ռուսական C-400 խնդիրը, և երևում է, որ հավատարիմ դաշնակցի դեր է խաղում Ուկրաինայի ճգնաժամում՝ որպես ԱՄՆ-ի հետ կապերը շտկելու միջոց։

Էմմա Չոբանյան