24.04.2026 | 23:32
Կապանում ջրանջատում կլինի
Թուրքիայի փոխնախագահը հաստատել է, որ երկրի հետախուզական ծառայությունն ակտիվորեն մասնակցել է Արցախյան 44-օրյա պատերազմին
Քաղաքականություն
03.12.2021 | 20:37
Թուրքիայի փոխնախագահը հայտարարել է, որ երկրի Ազգային հետախուզական կազմակերպությունը ակտիվ դերակատարում է ունեցել 2020 թվականի Արցախյան 44-օրյա պատերազմում՝ օգնելով հավասարակշռություն ձևավորել դաշտում, գրում է Nordic Monitor-ը։
Նշվում է, որ փոխնախագահ Ֆուաթ Օթքայը խորհրդարանի Բյուջեի և պլանավորման հանձնաժողովին է ներկայացրել նախագահականի ներքո գործող պետական ինստիտուտների տարեկան գործունեության հաշվետվությունը։ Հետախուզական ծառայության մասին խոսելով՝ Օքթայը նշել է, որ կազմակերպությունը երկրից դուրս գործողություններով Թուրքիայի շահերին մեծ ծառություն է մատուցում։
«Մի շարք տարածաշրջաններում, ինչպիսիք են Սիրիան, Լիբիան, Ղարաբաղը և վերջերս՝ Աֆղանստանը, կազմակերպությունը կարևոր աշխատանք է կատարում, որը պաշտպանում է մեր ազգային շահերը և ձևավորում հավասարակշռություն դաշտում՝ հօգուտ մեր երկրի, մեր պետական քաղաքականությանը համապատասխան»,- ասել է նա։
«Մենք ոչ միայն իրականացրել ենք մեր պատմության մեջ ամենահաջող գործողությունները ահաբեկչական կազմակերպությունների դեմ մեր երկրի սահմաններում և դրանցից դուրս, այլ նաև հասել ենք բազմաթիվ հաջողությունների՝ Ղարաբաղի 30-ամյա «օկուպացիայի» ավարտից մինչև պուտչիստների դեմ Լիբիայում լեգիտիմության համար պայքարը։ Մենք առաջադիմում ենք և ցույց տալիս մեր կոնկրետ ձեռքբերումները»,- հավելել է նա։
Այսպիսով, թուրք բարձրաստիճան պաշտոնյան ևս մեկ անգամ փաստում է Թուրքիայի անմիջական մասնակցությունը Արցախյան պատերազմում։
Ի դեպ, պատերազմում Անկարայի մասնակցության ու դերակատարման առնչությամբ Հայաստանը ՄԻԵԴ հայց է ներկայացրել Թուրքիայի դեմ։
Լրատվամիջոցը նաև գրում է, որ 2022 թվականի բյուջեի նախագծում հետախուզական կազմակերպությանը հատկացվում է 3,5 միլիարդ լիրա։
Ըստ Հաշվետվության պալատի տվյալների՝ 2021 թվականին կազմակերպությունը 495․4 միլիոն թուրքական լիրա է ծախսել «գաղտնի ծառայությունների համար»։ Բացի այդ, այդ նաև գաղտնի մեծ գումարներ է ծախսում նախագահին տրված հայեցողական միջոցներից։
Էմմա Չոբանյան
