«Սիսական» ջոկատի հրամանատար Աշոտ Մինասյանը կկալանավորվի

Վերաքննիչ քրեական դատարանը դատավոր Տիգրան Սիմոնյանի նախագահությամբ որոշում է կայացրել բավարարել Գլխավոր դատախազության բողոքը և «Սիսական» ջոկատի հրամանատար Աշոտ Մինասյանի նկատմամբ ընտրված խափանման միջոցը փոխարինել կալանքով։ Մինասյանը կկալանավորվի։ Այս մասին Factor.am-ի հետ զրույցում տեղեկացրեց Գլխավոր դատախազի խորհրդական Գոռ Աբրահամյանը։

Հիշեցնենք՝ շաբաթներ առաջ ՀՀ գլխավոր դատախազի տեղակալը դիմել էր Վճռաբեկ դատարան՝ միջնորդելով բեկանել Առաջին ատյանի և Վերաքննիչ դատարանների որոշումները և կայացնել Աշոտ Մինասյանի նկատմամբ կալանավորումը որպես խափանման միջոց կիրառելու վերաբերյալ դատական ակտ:

Այս քրեական գործով ի թիվս այլոց, իշխանության յուրացման նախապատրաստման, պետական, քաղաքական կամ հասարակական գործչի, մասնավորապես ՀՀ վարչապետի գործունեությունը դադարեցնելու նպատակով նրա սպանության նախապատրաստման, այդ նպատակով մի խումբ անձանց կողմից նախնական համաձայնությամբ ապօրինի կերպով զենք, ռազմամթերք, ձեռք բերելու, պահելու հանցավոր արարքները կատարելու համար մեղադրանք էր առաջադրվել Աշոտ Մինասյանին (հայտնի է որպես Սիսիանի ջոկատի հրամանատար, «Աշոտ Երկաթ» մականվամբ):

Ինչպես Երևան քաղաքի ընդհանուր իրավասության առաջին ատյանի դատարանը, այնպես էլ ՀՀ վերաքննիչ քրեական դատարանը մերժել էին Մինասյանի նկատմամբ կալանքը որպես խափանման միջոց կիրառելու վերաբերյալ վարույթն իրականացնող մարմնի և դատախազության միջնորդությունները: Մեղսագրվող բոլոր երեք հանցավոր արարքներին նրա առնչությունը հիմնավորված չէր համարել, այսինքն` հիմնավոր կասկածի բացակայության պատճառաբանությամբ:

Վճռաբեկ դատարանը, սակայն, հոկտեմբերի 7-ին որոշում էր կայացրել մասամբ բավարարել ստորադաս դատարանների կողմից Աշոտ Մինասյանի նկատմամբ կալանքը որպես խափանման միջոց ընտրելու վերաբերյալ միջնոդորդությունը մերժելու որոշումների դեմ ներկայացված դատախազության բողոքը և ուղարկել Առաջին ատյանի դատարան՝ նոր քննության: Դատարանը կրկին մերժել էր միջնորդությունը, որի ներկայացված վերաքննիչ բողոք այս անգամ բավարարվել է:

Ռոզա Վարդանյան