27.10.2026 | 00:08
Վարդան Մինասյանն աշխատանքի է անցել Լիբանանում
HRW-ը հիշեցրել է Բաքվին, որ հայ գերիների նկատմամբ բռնությունը ռազմական հանցագործություն է
19.11.2021 | 13:17
Human Rights Watch միջազգային իրավապաշտպան կազմակերպության Եվրոպայի ու Կենտրոնական Ասիայի բաժանմունքի տնօրեն Գիորգի Գոգիան անդրադարձել է նոյեմբերի 16-ին ՀՀ սուվերեն տարածքից Ադրբեջանի կողմից հայ զինծառայողների գերեվարմանը։
«Նոյեմբերի 16-ի մարտերից հետո, որոնք վատագույնն էին Ղարաբաղյան երկրորդ պատերազմից հետո, Ադրբեջանը գերեվարել է ամենաքիչը 13 հայ զինծառայողի։ Սոցիալական ցանցերում բազմաթիվ տեսանյութերը ցույց են տալիս, որ ադրբեջանական ուժերը դաժան և ստորացնող վերաբերմունք են ցուցաբերում պատանդառության ընթացքում։ Ռազմագերիների նկատմամբ բռնությունը ռազմական հանցագործություն է»,- թվիթերյան իր էջում գրել է Գոգիան։
Նա նշել է, որ «զզվելի տեսանյութերը, որոնք դեռ կազմակերպությունը չի ստուգել», ցույց են տալիս հայ գերիների նկատմամբ ծեծը, դաժան վերաբերմունքը, ինչպես նաև նրանց արժանապատվության նվաստացումը։
«Ժնևի կոնվենցիան պաշտպանում է ռազմագերիներին բռնության ու վախեցնող գործողություններից, վիրավորումից ու հանրային հետաքրքրասիրությունից։ Ադրբեջանը պետք է բոլոր հնարավոր բռնությունները հետաքննի և մեղավորներին պատասխանատվության ենթարկի։ Հատկապես, որ որոշ զինծառայողներ հպարտությամբ են բռնություն գործադրում և նույնիսկ չեն թաքցնում իրենց դեմքերը»,- գրել է HRW-ի պաշտոնյան՝ նշելով, որ Ժնևի 3-րդ կոնվենցիայի համաձայն՝ գերի ընկածներին պետք է տրվի ռազմագերու կարգավիճակ և նրանք պետք է հետ վերադարձվեն մարտական գործողություններից հետո։
Էմմա Չոբանյան
