18.12.2025 | 23:09
Գիտությունն ավելի հաճախ պետք է կապվի արդյունաբերության հետ, որպեսզի արդյունավետությունը հնարավոր լինի չափել. Հակոբ Արշակյան
Գևորգ Պապոյանը նոր կարգավորումներ է առաջարկում «Հաշվեքննիչ պալատի մասին» օրենքում
Քաղաքականություն
09.11.2021 | 12:24
ՀՀ ԱԺ ֆինանսավարկային եւ բյուջետային հարցերի մշտական հանձնաժողովը նոյեմբերի 9-ի նիստում առաջին ընթերցումով քննարկել է ԱԺ պատգամավոր Գեւորգ Պապոյանի հեղինակած ««Հաշվեքննիչ պալատի մասին» ՀՀ օրենքում լրացումներ եւ փոփոխություններ կատարելու մասին» օրենքի նախագիծը․ տեղեկացնում են ՀՀ ԱԺ-ից։
Առաջարկվում է պետական բյուջեի երեք, վեց եւ ինն ամիսների կատարման նկատմամբ ֆինանսական եւ համապատասխանության հաշվեքննությունների հետ մեկտեղ Ազգային ժողով ներկայացնել այդ ամիսների կատարման վերաբերյալ եզրակացություններ, որոնք կամփոփեն հաշվեքննությունների ընթացքում կազմված ընթացիկ եզրակացությունները:
Նախատեսվում է վերացնել պալատի այն պարտավորությունը, որով յուրաքանչյուր եռամսյակի առաջին երեք աշխատանքային օրվա ընթացքում պալատը պետք է Ազգային ժողով ներկայացնի այդ եռամսյակի ընթացքում Ազգային ժողով ներկայացվելիք ընթացիկ եզրակացությունների նախատեսվող ցանկը:
Նախագծի մշակման ընթացքում հաշվի են առնվել Հաշվեքննիչ պալատի, SIGMA Եվրոպական միության եւ Տնտեսական համագործակցության ու զարգացման կազմակերպության (OECD) համատեղ նախաձեռնության դիտարկումները, ինչպես նաեւ ՄԱԿ-ի զարգացման ծրագրի «Նոր Հայաստան՝ ժամանակակից խորհրդարան» ծրագրի փորձագետների իրականացրած վերլուծության արդյունքները:
Հարակից զեկույցում ՀՀ արդարադատության նախարարի տեղակալ Սուրեն Գրիգորյանը նշել է, որ Կառավարության առաջարկները մեծամասամբ հեղինակն ընդունել է: Փոխնախարարի խոսքով՝ Կառավարության համար նախաձեռնությունն ընդունելի է՝ առաջին ընթերցումից հետո գործադրի որոշ առաջարկներ քննարկելու պայմանով:
Հանձնաժողովի անդամ Արուսյակ Մանավազյանը գործընկերներին առաջարկել է կողմ քվեարկել:
Պատգամավորները մի շարք խնդիրներ են բարձրաձայնել «Հաշվեքննիչ պալատի մասին» օրենքի հետ կապված, նշել, որ օրենքը պետք է հիմնավոր փոփոխել:
Հանձնաժողովի նախագահ Գեւորգ Պապոյանն առաջարկել է առաջինից երկրորդ ընթերցում ընկած ժամանակահատվածում Կառավարության եւ Հաշվեքննիչ պալատի ներկայացուցիչների մասնակցությամբ կազմակերպել աշխատանքային քննարկումներ եւ շտկել օրենսդրական բացերը:
Օրենսդրական նախաձեռնությունն արժանացել է հանձնաժողովի դրական եզրակացությանը:
