14.01.2026 | 11:07
ԱԺ պետաիրավական հարցերի հանձնաժողովի նիստը՝ ՈՒՂԻՂ
Արձանագրել ենք ադրբեջանական ահաբեկչական բնույթի գործողություններ. ՄԻՊ
Հասարակություն
03.11.2021 | 11:27
ՀՀ մարդու իրավունքների պաշտպանի գրասենյակը արտահերթ զեկույց է պատրաստել Ադրբեջանի հետ շփման բոլոր տարածքներում անվտանգության գոտու անհրաժեշտության վերաբերյալ։
«Այցեր է կատարվել ՀՀ բոլոր սահմանային բնակավայրեր, մեկ տարի շարունակ անդադար մոնիթորինգ է իրականացվել Սյունիքում և Գեղարքունիքում։ Զեկույցում փաստերով ցույց են տրվել վտանգները, բերված են օբյեկտիվ ապացույցներ», – այս մասին այսօր՝ նոյեմբերի 3-ին, մամուլի ասուլիսի ժամանակ հայտարարեց ՀՀ մարդու իրավունքների պաշտպան Արման Թաթոյանը։
«Զեկույցն ամբողջությամբ հիմնված է բաց աղբյուրների վրա, որևէ կերպ զեկույցում չի ցուցադրվում Հայաստանում տեղակայումները, դիրքերը: Ավելին, այս զեկույցի աշխատանքները ևս մեկ անգամ հիմք տվեցին համոզվելու, որ Հայաստանի սահմանապահ զորքերի, ԶՈՒ ծառայողները իրականացնում են հերոսական ծառայություն՝ ունենալով բացառիկ առաքելություն՝ պաշտպանելու ՀՀ բնակիչների կյանքը, խաղաղ գոյակցության և մնացած բոլոր կենսական իրավունքները»,- նշեց ՄԻՊ-ը:
Թաթոյանը հավաստիացրեց, որ բացառապես փաստերով հիմնավորել են ադրբեջանական հանցավոր ահաբեկչական արարքները. «Ցույց ենք տվել կապը ադրբեջանական իշխանությունների քաղաքականության և շարունակվող խախտումների միջև։ Հիմնավորել ենք, որ անհրաժեշտ է անվտանգության գոտին։ Ադրբեջանական դրոշները, զինվորականները, տարբեր սարքավորումները, տեսախցիկները պետք է հեռացվեն մեր գյուղերի անմիջական հարևանությունից և մեր համայնքներն իրար կապող ճանապարհներից։ Առանց դրա չի կարող լինել իրավունքների վերականգնում»:
Թաթոյանը հավելեց, որ հայկական կողմը չպետք է հետ քաշվի, նրանք պետք է հեռանան, որովհետև զեկույցում ցույց է տրված, որ նրանց տեղակայումներն անօրինական են՝ բոլորը առանց բացառության:
Նա ընդգծեց, որ դեմարկացիայի և դելիմիտացիայի բացակայության պայմաններում հիմք չեն ընդունվել ոչ մի միջազգային չափանիշ:
«Ես կցուցադրեմ, որ խորհրդային ժամանակներից մարդկանց պատկանող հողերի վրա այսօր ֆիզիկապես ներկա են Ադրբեջանի զինված ուժերը:
Մենք միջազգային պահանջներով հիմնավորել ենք, որ սահմանների դելիմիտացիան և դեմարկացիան չի կարող համարվել լեգիտիմ, եթե չի ապահովում մարդու իրավունքները, չի համապատասխանում ժողովրդավարության և իրավունքի գերակայության կանոներին և չի ապահովում մարդկանց բնականոն կյանքը»,- նշեց Թաթոյանը:
Նա նշեց նաև, որ Հայաստանի պետական սահմանի մասին օրենքը նախատեսում է, որ կա սահմանային գոտի, սակայն այս դրույթը չի կարող կիրառելի լինել, քանի որ 44-օրյա պատերազմից հետո մեր գրեթե բոլոր բնակավայրերը հայտնվել են սահմանային գոտում։
«Բնակավայրեր ունենք, որտեղ ընդամենը մի քանի մետրից սկսած՝ արդեն մարդկանց տներ են։ Դա նշանակում է նոր տեղահանվածնե՞ր պետք է ունենանք, իհարկե ոչ:
Այս ասուլիսից հետո հրապարակային կդառնա զեկույց, որտեղ միջազգային փորձի վրա ցույց է տրված, թե ինչպես կարող է ստեղծվել անվտանգային գոտի: Աշխարհում կան այդպիսի փորձեր»,-նշեց մարդու իրավունքների պաշտպանը։
Մանրամասները՝ տեսանյութում:
