Ո՞վ կփոխարինի Առուշանյանին․ Կառավարությունն օրենքում փոփոխություններ է առաջարկում

Համայնքի ղեկավարի կողմից պարտականությունների կատարումը 1 ամիս անհնար լինելու դեպքում համայնքապետի պաշտոնակատար կարող է նշանակվել համայնքի ղեկավարի տեղակալը, իսկ պաշտոնը թափուր լինելու պարագայում մարզպետը նշանակում է համայնքի ղեկավարի պաշտոնակատար։

«Տեղական ինքնակառավարման մասին» օրենքում այս փոփոխությունը կատարելու վերաբերյալ նախագիծն այսօր հավանության արժանացավ Տարածքային կառավարման, տեղական ինքնակառավարման, գյուղատնտեսության և շրջակա միջավայրի պահպանության հարցերի մշտական հանձնաժողովում։

Ի՞նչ է նշանակում «պարտականությունների կատարման անհնարինությունը»․ Factor.am-ի հարցին ի պատասխան ներկայացրեց նախագծի հարակից զեկուցող, ՔՊ խմբակցության պատգամավոր Սերգեյ Բագրատյանը։

«Օրինակ՝ դեպք է պատահել, ինքը երկրից բացակայում է, ֆիզիկապես հնարավորություն չունի դա անելու կամ, հիվանդացել է»,- մանրամասնեց Բագրատյանը։

Հարցին՝ այս կարգավորումը կարո՞ղ է առնչվել Գորիսի նորընտիր քաղաքապետ Առուշ Առուշանյանի փոխարեն քաղաքապետի պաշտոնակատար նշանակելուն, պատգամավորը դրական պատասխան տվեց:

«Եթե կալանավորված է, դա անհնարինություն է, տեղակալն է աշխատելու։ Նշված փոփոխության դրույթը այս դեպքում ևս կարող է գործել»,- նշեց Բագրատյանը։

Հիշեցնենք, որ հոկտեմբերի 17-ին անցկացված ՏԻՄ ընտրությունների նախնական արդյունքներով Գորիսում հաղթել է 2021-ի արտահերթ խորհրդարանական ընտրություններից հետո ընտրակաշառքի գործով կալանավորված գործող համայնքապետ Առուշ Առուշանյանի գլխավորած «Առուշ Առուշանյանի» դաշինքը։

Վերջինս ստացել է քվեների 60,28 տոկոսը։ Ընտրության նախնական արդյունքների ամփոփումից հետո անհայտ էր, թե ինչպես է տեղի ունենալու համայնքի կառավարումը, եթե ընտրված քաղաքապետը կալանավորված է։

Փաստորեն, Կառավարության այս նախագծի հաստատման դեպքում Առուշանյանի փոխարեն Գորիսի համայնքապետ կնշանակվի կամ նրա տեղակալներից մեկը, կամ տեղակալի պաշտոնը թափուր լինելու դեպքում մարզպետը կնշանակի այլ անձի՝ իր հայեցողությամբ։

Նշենք նաև, որ առաջարկվող կարգավորմամբ՝ նշանակված պաշտոնակատարը կարող է պաշտոնավարել մինչև ընտրված քաղաքապետի ծառայողական պարտականությունների կատարման անհնարինություն առաջացնող հանգամանքների վերացումը։ Այսինքն՝ եթե Գորիսի ընտրված քաղաքապետն ազատվի կալանքից, նա կվերադառնա իր պաշտոնին։

Նախագիծն առայժմ արժանացել է միայն հանձնաժողովի հավանությանը։ Այն կքննարկվի նաև Ազգային ժողովում և ուժի մեջ կմտնի միայն ԱԺ-ի կողմից վերջնական ընդունումից և նախագահի ստորագրությունից հետո։

Անժելա Պողոսյան