26.10.2026 | 16:50
Հաջիևը հայտարարել է, թե Հայաստանն ու հայ հասարակությունը «պետք է ներողություն խնդրեն ադրբեջանցիներից»
ԵՐԵՎԱՆԻ ԺԱՄԱՆԱԿՈՎ․ Մեր մտավորականությունը ջլատված է և թևաթափ. մշակութային օջախները պետք է նրանց համար հավաքատեղի դառնան. Կարո Վարդանյան․ ՏԵՍԱՆՅՈՒԹ
Հաղորդաշարեր
02.10.2021 | 17:02
«Հայ ժողովուրդը հետպատերազմյան շրջանում ծանր փորձության մեջ է հայտնվել, ու չգիտենք՝ երբևէ կհաղթահարենք այն, թե` ոչ: Նմանատիպ փորձության մեջ էինք հարյուր տարի առաջ։ Ցավոք, այսօր էլ մենք մեր սխալները չենք համակարգել, անաչառ կերպով չենք յուրացրել, հետևություններ չենք արել, այդ պատճառով էլ ամեն ինչ նույնությամբ կրկնվում է մեզ հետ»,- Factor.am-ի հետ զրույցում նման տեսակետ է հայտնում Չարենցի անվան Գրականության և արվեստի թանգարանի տնօրեն Կարո Վարդանյանը՝ համեմատականներ տանելով, օրինակ, Կարսի և Շուշիի անկման պատմությունների միջև:
Նրա խոսքով՝ եթե այսօր դժվար է վերծանել պատմական անցքերը, ապա վաղը մեր ապագա սերունդների համար տեղեկատվական հսկա հոսքի մեջ է՛լ ավելի դժվար է լինելու ճշգրիտ փաստեր հավաքագրելն ու համապատասխան եզրակացություններ անելը։
«Սուտն ու քաոսն իշխում են թե՛ ընդդիմադիր, թե՛ իշխանական դաշտում, ապագա սերունդները խճճվելու են տեղեկատվական հոսքի մեջ և դուրս չեն գալու այդ ճահճից»,- ասում է նա:
Մեր զրուցակիցն անդրադառնում է նաև Հայաստանում թանգարանային անցուդարձին: Հարցին՝ քաղաքական գործիչներն այցելո՞ւմ են, արդյոք, թանգարաններ, թե՞ եզրափակվում են միայն «Թանգարային գիշերներին» մասնակցելով, Կարո Վարդանյանը պատասխանում է. «Քաղաքական գործիչները շատ հաճախ չեն գալիս, բայց լինում են այստեղ: Ոմանք գալիս են արխիվներն ուսումնասիրելու: Իրեն հարգող քաղաքական գործիչն ուզում է քիչ թե շատ ինֆորմացվել պատմությունից, ծանոթանալ վկայություններին»:
Ըստ նրա՝ այսօր հայաստանյան մի շարք թանգարանների հաջողվում է զբոսաշրջիկների համար լինել գրավիչ, ներկայանալ ողջ ներուժով, կուտակել արտաբյուջե և հոգալ այն ծախսերը, որոնք պետությունն ի զորու չէ հոգալու:
Կարո Վարդանյանի կարծիքով՝ մշակութային կենտրոնները պետք է մեծ դերակատարում ունենան մտավորականների և հանրության կապն ապահովելու հարցում. «Ցավոք, այս ասպարեզում դեռ շատ անելիքներ ունենք: Այսօր մեր մտավորականությունը հիասթափված, ջլատված և թևաթափ վիճակում է։ Մշակութային օջախները պետք է նրանց համար հավաքատեղի դառնան»:
Հարցազրույցն ամբողջությամբ՝ տեսանյութում:
Աննա Բաբաջանյան
