ԱԺ-ն մերժեց «Ելք» խմբակցության ներկայացրած «Մարտի 1»-ի վերաբերյալ հայտարարության նախագծի ընդունումը

Ազգային ժողովն այսօր մերժեց ընդդիմադիր «Ելք» խմբակցության նախաձեռնած «Մարտի 1-2-ի իրադարձությունների վերաբերյալ» ԱԺ հայտարարության տեքստ ընդունելու նախագիծը։ Կողմ քվեարկեց 9, դեմ՝ 56, ձեռնպահ՝ 7 պատգամավոր։ Մինչ քվեարկությունը «Ծառուկյան» խմբակցության պատգամավոր Գևորգ Պետրոսյանն էլ պարզաբանեց՝ իրենց խմբակցությունը չի մասնակցելու քվեարկությանը՝ ելնելով նախագծի դրույթների մեկնաբանությունից, որտեղ ԱԺ կողմից իրավապահ մարմիններին որոշակի դատավարական գործողություններ կատարելու պահանջ է դրված:

«Մենք այստեղ խորհրդարանկան վերահսկողություն հասկացությունը չպետք է տարածական մեկնաբանության մեջ դիտարկենք, այնպես, որ այն իշխանությունների տարանջատման սկզբունքի խախտման ձևով լինի։ Մենք տեսնում ենք Սահմանադրության 4-րդ հոդվածի խախտման վտանգ, դրա համար «Ծառուկյան» խմբակցությունը չի մասնակցի քվեարկությանը»,- նշեց Պետրոսյանը։

ՀՅԴ-ն նախագծին ձեռնպահ քվեարկեց: Ընդդիմադիր «Ելք» խմբակցության ղեկավար Նիկոլ Փաշինյանը շարունակեց պնդել՝ դատախազությունում չկան տեսագրություններ, որոնք կապացուցեն Ռոբերտ Քոչարյանի այն հայտարարությունը, թե ցուցարարները կրակել են զինվորների վրա:

«Պետք է Ռոբերտ Քոչարյանին կանչել հարցաքննության, որպեսզի նա պարզաբանի՝ ինչի՞ վրա է հիմնվել նման հայտարարություն անելուց», – ասաց Փաշինյանը:

ԱԺ ՀՀԿ խմբակցության պատգամավոր, նախկին գլխավոր դատախազ Գևորգ Կոստանյանը հակադարձեց, թե Նիկոլ Փաշինյանը չի կարող այդպիսի պնդում անել, դա համարելով անպատասխանատու հայտարարություն: Բացի այդ, Գևորգ Կոստանյանը շեշտեց՝ քրեական գործի նյութերին ծանոթանալու իրավունք ոչ ոք չունի։

«Վերջակետ փորձեմ դնել Ռոբերտ Քոչարյանի հարցաքննման հետ կապված այս երկխոսություններին։ Բոլոր ձայնագրությունները, որոնց մասին Ռոբերտ Քորչարյանը՝ որպես երկրի նախագահ, խոսել է՝ քրեական գործում կան։ Քրեական գործի նյութերին ծանոթանալու իրավունք՝ անկախ մարտահրավերներից, ոչ դուք, պարոն Փաշինյան, ոչ էլ ես, ոչ էլ այստեղ նստածներից որևէ մեկը, չունի: Դրանք քրեական գործի մաս են և քննություն դրանցով իրականացվում է»,- ասաց Կոստանյանը։

Շողիկ Գալստյան