19.11.2024 | 12:28
Փաշինյանի նոր կերպարը․ վարչապետը փոխել է ֆեյսբուքյան էջի գլխավոր լուսանկարն ու ետնանկարը
Հայաստան կժամանի Ուրուգվայի ԱԳ նախարար Ֆրանսիսկո Բուստիժոն
Քաղաքականություն
13.08.2021 | 18:18
Օգոստոսի 16-ին պաշտոնական այցով Հայաստան կժամանի Ուրուգվայի արտաքին գործերի նախարար Ֆրանսիսկո Բուստիժոն: Այս մասին հայտնում է ԱԳՆ մամուլի ծառայությունը։
Նույն օրն ՀՀ ԱԳՆ-ում կկայանա Հայաստանի և Ուրուգվայի արտաքին քաղաքական գերատեսչությունների ղեկավարների հանդիպումը: Պաշտոնական այցի շրջանակներում նախատեսված են հանդիպումներ ՀՀ վարչապետի, ՀՀ ԱԺ նախագահի և Ամենայն Հայոց Կաթողիկոսի հետ:
ԱԳՆ կայքն ընդգծում է, որ Հայաստանը և Ուրուգվայը ավանդաբար բարեկամ երկրներ են։ 1965 թ․ Ուրուգվայի խորհրդարանն առաջինն է պաշտոնապես ճանաչել Հայոց ցեղասպանությունը։
Երկկողմ հարաբերություններ
Հայաստանի Հանրապետության և Ուրուգվայի Արևելյան Հանրապետության միջև դիվանագիտական հարաբերությունները հաստատվել են 1992 թ. մայիսի 27-ին:
1996թ. Արգենտինայում ՀՀ դեսպանությունը համատեղության կարգով հավատարմագրված է նաև Ուրուգվայում:
1997-2019 թթ. Երևանում գործում էր Ուրուգվայի պատվո հյուպատոսի գրասենյակը:
2019 թ. հունվարից Հայաստանում Ուրուգվայի դեսպանն է Կարլոս Սգարբի ֆոն Շտայնմանը (նստավայրը՝ Թեհրան):
2019 թ. օգոստոսին Երևանում բացվել է Ուրուգվայի գլխավոր հյուպատոսությունը (գլխավոր հյուպատոս՝ Էդուարդո Ռոսենբրոկ)։
Երկու երկրների միջև փոխադարձաբար ազատականացված է մուտքի արտոնագրային ռեժիմը:
Հայաստանը և Ուրուգվայն ակտիվորեն համագործակցում են միջազգային կազմակերպություններում։
Քաղաքական երկխոսություն
2018թ. հոկտեմբերին ՀՀ ԱԳ նախարարի տեղակալ Աշոտ Հովակիմյանի մասնակցությամբ Մոնտեվիդեոյում կայացել են հայ-ուրուգվայական քաղաքական խորհրդակցություններ:
2020թ. հոկտեմբերի 30-ին տեղի է ունեցել Հայաստանի ԱԳ նախարար Զոհրաբ Մնացականյանի և Ուրուգվայի ԱԳ նախարար Ֆրանսիսկո Բուստիժոյի հեռախոսազրույցը։
2021 թ․ մարտի 19-ին տեղի է ունեցել Հայաստանի ԱԳ նախարար Արա Այվազյանի և Ուրուգվայի ԱԳ նախարար Ֆրանսիսկո Բուստիժոյի հեռախոսազրույցը։
Միջխորհրդարանական համագործակցություն
Հայ-ուրուգվայական խորհրդարանական կապերը աչքի են ընկնում ակտիվությամբ, երկու երկրների խորհրդարաններում ավանդաբար գործել են բարեկամության խմբեր: Պարբերական բնույթ են կրում խորհրդարանական բարձրաստիճան պատվիրակությունների փոխայցելությունները:
Կրթական համագործակցություն
2021 թ․ օգոստոսի 6-ին ստորագրվել է «Հայաստանի Հանրապետության կրթության, գիտության, մշակույթի և սպորտի նախարարության և Հանրապետության համալսարանի (Ուրուգվայի Արևելյան Հանրապետություն) միջև 2021-2022 թթ. ուսումնական տարվա ընթացքում հայոց լեզվի դասընթացների կազմակերպման մասին» փոխըմբռնման հուշագիրը:
Ուրուգվայի հայ համայնքը
Հայերն Ուրուգվայում հաստատվել են 20-րդ դարի սկզբին, իսկ համայնքը ձևավորվել է 1920-ական թվականներին: Հայերն Ուրուգվայ են տեղափոխվել առավելապես Կիլիկիայից և Մերձավոր Արևելքի երկրներից: Ներկայումս Ուրուգվայում բնակվում է մոտ 20 000 հայ, որոնք հիմնականում կենտրոնացած են Մոնտեվիդեոյում: Ուրուգվայի հայ համայնքն ակտիվորեն ներգրավված է երկրի հասարակական և մշակութային կյանքում:
Հայ առաքելական եկեղեցուց բացի գործում են նաև Հայ կաթոլիկ, Հայ ավետարանական ու Հայ ավետարանչական եղբայրության եկեղեցիները:
Համայնքում գործում է երկու դպրոց` Նուբարյան (ՀԲԸՄ) և Ներսեսյան (Եկեղեցու կենտրոնական վարչություն): Ուրուգվայահայ համայնքում կարևոր դեր են խաղում «Ռադիո Կոմիտաս» և «Բարեգործականի Ձայն» ռադիոժամերը, որոնք ձայնասփռվում են ոչ միայն Ուրուգվայում, այլև Արգենտինայում:
Մոնտեվիդեոյում կա «Armenia» անունը կրող հրապարակ, որտեղ տեղադրված են Մեծ Եղեռնի զոհերի հիշատակին նվիրված հուշակոթող և խաչքար: «Armenia» անունը կրող հրապարակ կա նաև Պիրիապոլիս ծովափնյա քաղաքում: Միևնույն ժամանակ, Ուրուգվայի անվան հրապարակ կա Երևանում:
