19.04.2026 | 22:28
Իրանը հրաժարվել է ԱՄՆ-ի հետ բանակցությունների երկրորդ փուլին պատվիրակություն ուղարկել․ Tasnim
Կենտրոնական բանկում հաշիվների կենտրոնացված ռեեստր կստեղծվի․ ԱԺ-ն ամբողջությամբ ընդունեց նախագիծը
Տնտեսություն
30.06.2021 | 16:26
ՀՀ կենտրոնական բանկում կստեղծվի բանկային բոլոր հաշիվների կենտրոնացված ռեեստր: Այսօր Ազգային ժողովի արտահերթ նիստում երկրորդ ընթերցմամբ և ամբողջությամբ ընդունվեց «Հայաստանի Հանրապետության կենտրոնական բանկի մասին» ՀՀ օրենքում լրացում կատարելու մասին օրենքի նախագիծ։
Կենտրոնացված ռեեստրը կներառի վերջին 5 տարիներին բացված, փակված բանկային հաշիվների ու տրամադրված բանկային պահատուփերի վերաբերյալ տեղեկություններ: Կենտրոնական բանկի փոխնախագահ Ներսես Երիցյանը վստահեցրեց, որ այս տվյալները որևէ բանկային գաղտնիք չեն ներառելու: Խոսքը ոչ թե բանկային հաշիվներում մնացորդի կամ շարժերի մասին է, այլ միայն հաշվի առկայության։ Նախագծի նպատակներից մեկը փողերի լվացման ու ահաբեկչության ֆինանսավորման դեմ պայքարն առավել արդյունավետ դարձնելն է։
Երիցյանի խոսքով՝ այսօր էլ, անհրաժեշտության դեպքում, իրավասու մարմինները հարցում են կատարում Կենտրոնական բանկին, վերջինը ճշտում է այդ տեղեկություններն ու տրամադրում իրավապահներին, սակայն դա ծախսատար է և՛ բանկերի, և՛ հենց Կենտրոնական բանկի համար։ Ըստ ներկայացված նախագծի՝ նմանատիպ ռեեստրը լայն տարածում ունի Եվրամիության երկրներում, մասնավորապես՝ Չեխիայում, Իսպանիայում, Լատվիայում, Ֆրանսիայում, Ավստրիայում և այլն:
