Ճնշում են գործադրում, որ Սյունիքում ոչ թե կոմունիկացիաների բացում, այլ միջանցք լինի՝ առանձին կարգավիճակով․ Տարոն Հովհաննիսյան․ ՏԵՍԱՆՅՈՒԹ

Սյունիքում ադրբեջանցիների ներխուժման, հնարավոր հանգուցալուծումների մասին Factor TV-ի տաղավարում զրուցել ենք ադրբեջանագետ Տարոն Հովհաննիսյանի հետ

-Պարո՛ն Հովհաննիսյան, Նիկոլ Փաշինյանն ասում է, որ սա սադրանք է, որը, հնարավոր է, ավելի մեծ գործողության համար է կատարվել։ Ի՞նչ գործողության մասին կարող է լինել խոսքը։

-Ունեմ իմ սեփական ենթադրությունները։ Արցախյան երկրորդ պատերազմում հաղթանակ տարան, դրանից հետո փորձում են բոլոր ճակատներում չնշել, թույլ չտալ, որ Հայաստանը՝ հայկական բանակը, կարողանա վերականգնվել։ Եվ քանի դեռ Հայաստանն այսքան թույլ է և բանակը թուլացած է, իրենց տեսանկյունից նպաստավոր իրավիճակ է, փորձում են բոլոր հնարավոր տեղերում էլ ավելի նպաստավոր դիրքեր ունենալ։

Մյուս նպատակը, կարծում եմ, Սյունիքով միջանցք ստանալն է, այդ ուղղությամբ բոլոր մակարդակներում ճնշում գործադրելը, որպեսզի դա լինի ոչ թե կոմունիկացիաների բացում, այլ լինի առանձին կարգավիճակով միջանցքի տրամադրում Ադրբեջանին՝ Սյունիքի հարավով, որտեղ Հայաստանը կհրաժարվի իր սուվերեն իրավունքների մի մասից։

-Ադրբեջանցիները եկել են, ասում են՝ ահա մեր քարտեզը, սա էլ մեր հողն է։ Ընդ որում՝ շատ լավ հասկանում են, որ դա կեղծիք է, և որ իրենք կեղծարարությամբ են զբաղված։ Հիմա բանակցությունները ի՞նչ սպասելիքներով են ընթանում այս դեպքում։

-ՊՆ հայտարարությունից դատելով՝ մեր կողմից սպասելիքը մեկն է, որ պետք է հետ քաշվեն իրենց նախկին դիրքեր։ Ադրբեջանը, կարծես, այդքան էլ ցանկություն չունի․ եկել են, փորձում են հիմնավորվել։

Ինչ վերաբերում է քարտեզներին, ապա չկա աշխարհում որևէ քարտեզ, որ ցույց կտա, որ այն տեղը, որտեղ իրենք հիմա գտնվում են, երբևիցե եղել է Խորհրդային Ադրբեջանի տարածքում։ Նման բան չի եղել։

-Ռուսաստանը հայտնել է, որ շարունակում է միջնորդական ջանքեր։ Այսինքն՝ ոչ թե դաշնակցային, այլ միջնորդական։ Ինչո՞ւ։

-Ադրբեջանի հետ Հայաստանի հարաբերություններում ես չեմ հիշում մի իրավիճակ, որ Ռուսաստանը կատարել է դաշնակցային պարտականություններ, ոչ թե միջնորդական։ Իրենք իրենց միշտ դիրքավորել են միջնորդի դերում, և պարզ հայտարարել են, որ չնայած Հայաստանի հետ ռազմական դաշինքի մեջ են, իրենք կարևոր հարաբերություններ ունեն նաև Ադրբեջանի հետ։

Երբ ադրբեջանցիները 3․5 կմ մտել են Հայաստանի տարածք, ինչն աչքով էլ տեսանելի է, եթե դու անում ես չեզոք հայտարարություն, ապա նշանակում է, որ, ըստ էության, դու օգնում ես մյուս կողմին։ Ես չեմ շտապի միանշանակ հայտարարություններ անել, քանի որ կարող ենք գործ ունենալ ներքին գործընթացների հետ, որոնցից տեղյակ չենք։ Բայց զուտ հայտարարությունները վերլուծելու դեպքում Ռուսաստանի և Միացյալ Նահանգների հայտարարություններն այս իրավիճակում նպաստում են, ստացվում են հօգուտ Ադրբեջանի, ոչ թե հօգուտ ստեղծված իրավիճակը լուծելու։

Հարցազրույցն ամբողջությամբ՝ տեսանյութում։

Գարիկ Հարությունյան