Կամավոր ատեստավորում, թե՞ «ահաբեկում»․ինչո՞ւ են ուսուցիչները խուսափում ատեստավորման առաջարկից. ՏԵՍԱՆՅՈՒԹ

Կրթության ոլորտում իրականացվող հերթական փոփոխությունը բուռն քննարկումների առիթ է դարձել մանկավարժների շրջանում։ Հայաստանի կրթության, գիտության, մշակույթի և սպորտի նախարար Վահրամ Դումանյանի հրամանով հաստատվել է հանրակրթական դպրոցի ուսուցիչների կամավոր ատեստավորման փորձնական ծրագրի աշխատակարգը: Պետական հանրակրթական դպրոցների ուսուցիչները կամավոր ատեստավորման արդյունքում աշխատավարձի 30-50 տոկոս հավելավճար կստանան: Կամավոր ատեստավորման ժամանակ ստուգվում են ուսուցիչների առարկայական գիտելիքները, և 60 միավորից բարձր արդյունք ցուցաբերելու դեպքում ուսուցիչը կստանա հավելավճար: Կամավոր ատեստավորումը և ուսուցչի առարկայական գիտելիքի ստուգումը կատարվում են բացառապես ուսուցչի ցանկությամբ` նրա կողմից հայտ ներկայացնելու պարագայում: Ուսուցիչների շրջանում սակայն, բողոքի ալիք է բարձրացել միանգամից մի քանի հարցի հետ կապված։

Կրթության փորձագետ և ուսուցիչ Արսեն Վարդանյանն այն համոզման է, որ կրթության ոլորտի բարեփոխումները չպետք է արվեն հապճեպ և տարերայնորեն, փոխարենը հարկավոր է գնահատել կարիքները։ Նրա խոսքով՝ մի կողմից լավ է, որ գիտելիքների ստուգմամբ փորձ է արվում մանկավարժին պահել ձիգ և զգաստ վիճակում, մյուս կողմից՝ դա արվում է թերի ձևով․ գնահատվում են ուսուցչի առարկայական գիտելիքները, իսկ մեթոդական մասը ոչ մի թեստով չափել հնարավոր չէ։ Կրթության զարգացման և նորարարության ազգային կենտրոնի տնօրեն Արտաշես Թորոսյանը նկատում է՝ կան ատեստավորման հետ կապված բազմաթիվ մտավախություններ և սխալ տեղեկություններ։ Ուսուցիչների մի մասն ընդդիմանում է գործընթացին, բայց կա նաև մի հատված, որ պատրաստ է փորձել գիտելիքները։ Արտաշես Թորոսյանի խոսքով՝ ուսուցիչների մասնակցությունը կամավոր ատեստավորման գործընթացին առանձնակի կարևոր է նաև դպրոցի հեղինակության համար։ Եթե ուսուցիչները խուսափում են ատեստավորվել՝ կնշանակի վստահ չեն, որ ամուր գիտելիք ունեն։

Ուսուցչիները, սակայն կոլեգաների անվստահության այլ պատճառներ են մատնանշում։ Արտաշես Թորոսյանը շեշտում է՝ ատեստավորման միջոցով նպատակ ունեն խրախուսելու բարձր պատրաստվածություն ունեցող ուսւոցիչներին։ Հավելենք, որ կամավոր ատեստավորման նպատակով ուսուցիչների դիմումներն ընդունվում են մայիսի 3-ից մինչև մայիսի 31-ը։ Ուսուցչի առարկայական գիտելիքի ստուգման ժամանակացույցը հաստատվում է նախարարի հրամանով և հրապարակվում Գնահատման, թեստավորման կենտրոնի (ԳԹԿ) ու Կրթական տեխնոլոգիաների ազգային կենտրոնի (ԿՏԱԿ) կայքերում՝ ոչ ուշ, քան մինչև օգոստոսի 20-ը:

Մանրամասները՝ տեսանյութում։

Աննա Բաբաջանյան