Շատ վտանգավոր լռություն է, վարչապետը պարտավոր է տեղեկացնել՝ ինչ է կատարվում Սյունիքում․ Ալեքսանյան. ՏԵՍԱՆՅՈՒԹ

Factor TV-ի հարցազրույցը «Լրագրողներ հանուն մարդու իրավունքների» ՀԿ ղեկավար, իրավապաշտպան Ժաննա Ալեքսանյանի հետ

-ԵԽԽՎ-ում Հայաստանի խորհրդարանական պատվիրակներից մեկը մեզ հետ զրույցում նշեց՝ ակնկալում են, որ ԵԽԽՎ պատգամավորներն իրենց երկրներում կխոսեն դիվանագետների հետ, և նրանք լրացուցիչ ճնշումներ կգործադրեն Ադրբեջանի վրա: Հայաստանի հաջորդ քայլերը որո՞նք պետք է լինեն, ի՞նչ նոր մակարդակի պետք է բարձրացվի հայ ռազմագերիների և Ադրբեջանում պահվող անձանց հարցը:

-Գիտեք՝ հիմա նաև Ադրբեջանի ԵՏՄ մտնելու մասին խոսակցություններ կան, մեր վերլուծաբանները կարծում են, որ սա պետք է նախապայմաններով լինի, այսինքն՝ Հայաստանն իր համաձայնությունը տալուց առաջ պետք է իր պահանջները դնի, որոնցից առաջինը պետք է լինի գերիների հարցը: Ես չգիտեմ՝ կդրվի այդպիսի խնդիր, թե՞ ոչ, Հայաստանի իշխանությունները կգնա՞ն այդ քայլին, կպահե՞ն այդպիսի հստակ կեցվածք՝ իրենց դիրքորոշումը հայտնել՝ ոչ մի կերպ չնահանջելով, թե՞ ոչ:

-Կամք դրսևորելով․․․

-Այո՛: Այսպիսի հնարավորությունները պետք է օգտագործել: Կային նաև այլ հնարավորություններ, որոնք Հայաստանի իշխանությունները բաց թողեցին, տեսնում ենք, որ վճռական չեն։ Ես չեմ ասում, թե իրենք չեն ուզում, որ գերիները վերադառնան, բայց դրա համար պետք է հստակ և կտրուկ դիրքորոշում ունենալ:

-Ադրբեջանը, թեև մարտական գործողություններից ամիսներ են անցել, շարունակում է սպառնալիքներ տեղալ, համարում են Արցախի հարցը լուծված է և հիմա արդեն Սյունիքի նկատմամբ են պահանջներ ներկայացնում։ Ընդ որում՝ դրանք ոչ միայն տարածքային պահանջներ են, այլ նաև սպառնալիքներ են՝ ուղղված Հայաստանի բնակչությանը: Այստեղ ի՞նչ ունենք անելու՝ նաև միջազգային հանրության ջանքերով:

-Մենք պետք է ուղղակի աղաղակենք այս իրավիճակի մասին, բոլորին պետք է տեղեկացնենք, և Ադրբեջանին պետք է համապատասխան պատասխան տալ: Կան վերլուծություններ, ըստ որոնց՝ Սյունիքը մտնում է Լավրովյան պլանի մեջ: Չգիտեմ՝ դա ճիշտ է, թե ճիշտ չէ, բայց զգացվում է, որ Սյունիքի վրա կենտրոնացում կա, ուրեմն՝ այդ կենտրոնացումը հենց այնպես չէ: Ես չգիտեմ՝ ինչ կլինի Հայաստանի հետ, եթե իրոք ինչ-որ կարգավիճակ տրվի Սյունիքին: Երեկ հարցազրույցներ լսեցի, որտեղ ասվում էր, որ Ռուսաստանի ներկայացուցչի ուղեկցությամբ էր Փաշինյանը ժամանել Սյունիք, և մենք ոչ մի բանից տեղյակ չենք: Այս իշխանությունների գործունեության ոչ թափանցիկությունը բերում է այս իրավիճակին: Ինչո՞ւ մենք այդ մասին չգիտենք, ինչո՞ւ ես դու նրա ուղեկցությամբ գնում, ի՞նչ է կատարվում, ինչո՞ւ մենք չպետք է իմանանք մեր հայրենիքի ամեն մի կտոր հողի, տարածքի մասին, կամ այն մարդիկ, որ ապրում են Սյունիքում, չպե՞տք է իմանան՝ ինչ է կատարվում: Հիշում ենք՝ ինչ կատարվեց պատերազմի ժամանակ, դատարկեցին Շուշին, Քելբաջարը, մարդիկ իրենց տները վառեցին, հեռացան, սարսափելի տեսարաններ էին, որոնք մենք չենք մոռանա: Չեմ ուզում հավատալ, որ Սյունիքում էլ այդպես կլինի, բայց մենք պետք է հասկանանք՝ ինչ է տեղի ունենում: Եվ իշխանությունը, վարչապետը պարտավոր է տեղեկացնել մեզ, բայց վտանգավոր լռություն է, և մենք տեսնում ենք, որ դա շատ հաճախ ի շահ Ռուսաստանի է:

Հարցազրույցն ամբողջությամբ՝ տեսանյութում։

Գարիկ Հարությունյան