ԱՄՆ կողմից ցեղասպանության ճանաչումով դատարանները հատուցման, պատժի մեխանիզմներ կստանան․ Հովսեփ Խուրշուդյան․ ՏԵՍԱՆՅՈՒԹ

ԱՄՆ նախագահի կողմից Հայոց ցեղասպանության ճանաչման հնարավորության, Սյունիքի շուրջ տարածաշրջանային իրավիճակի մասին  Factor TV-ն զրուցել է «Ազատ քաղաքացի» ՀԿ նախագահ Հովսեփ Խուրշուդյանի հետ

-Սկսենք այսօր բուռն քննարկվող լուրից։ ԱՄՆ նախագահ Ջո Բայդենը կարող է ճանաչել Հայոց ցեղասպանությունը։ Ի՞նչ է փոխվելու սրանով։

-Մենք պետք է հասկանանք կոնտեքստը, թե ինչ պայմաններում է դա արվում և ինչ նպատակով։ Բնականաբար, առաջին հերթին խնդիր է դրված Թուրքիային կարգի հրավիրելու։ Սա ընդամենը առիթներից և հնարավորություններից մեկն է, լծակներից մեկն է՝ ճնշելու Թուրքիային։ Որ ասում են՝ դա ընդամենը բառ է լինելու, կասի կամ կարտաբերի, մենք էլ կուրախանանք՝ չէ՛, այդպես չէ։ Դա լուրջ հետևանքներ կարող է բերել, որովհետև Ամերիկայի գործադիրի ճանաչումից հետո կարող է ճանաչումների շարք տեղի ունենալ։

-Սյունիքի մասին։ Մարզի բնակավայրերը հայտնվել են սահմանին։ Սյունեցիները ինչպե՞ս պետք է հայտնեն իրենց բողոքը, ինչպե՞ս լսելի դառնան վարչապետի համար։

-Նույն վարչապետն այցելել էր՝ նաև այդ մարդկանց հետ հանդիպելու, որը նրան թույլ չտրվեց անել։ Այսինքն՝ այն մարդիկ, որոնք կուզենային Ագարակում էլ, Մեղրիում էլ իջնել, հանդիպել, իրենց բողոքը, իրենց մտահոգությունն արտահայտել, հարցեր տալ, մի խումբ մարդկանց ագրեսիվ կեցվածքի արդյունքում այդ մարդկանց հնարավորություն չտրվեց այդ հանդիպմանը մասնակցել։

Բայց Սյունիքի հարցն այսօր մտահոգում է ոչ միայն Հայաստանին, ոչ միայն նույնիսկ Ռուսաստանին, որը վտանգ ունի՝ ամբողջությամբ վարկաբեկվելու թե՛ որպես Արցախի հարցում միջնորդ, թե՛ որպես Հայաստանի անվտանգության երաշխավոր։ Պատկերացնո՞ւմ եք, եթե այդ բոլոր հարցերով ինքը վարկաբեկվի, ինքն ուղղակի դուրս կշպրտվի տարածաշրջանից։ Բայց որ շատ ավելի կարևոր է, Հայաստանից ու Ռուսաստանից բացի՝ Սյունիքի հարցում մտահոգ ուժերից է նաև Արևմուտքը։ Պատահական չէ ԱՄՆ դեսպանի այցելությունը Սյունիք հենց այս պահին։

-Ի՞նչ խնդիր է դեսպանը լուծում այնտեղ։

-Դա հենց ուժի ցուցադրություն է։ Որ ասում ենք՝ Միացյալ Նահանգների վերադարձ, դա միայն բազա դնելը չէ։ Երբ դեսպանը գնում է, դա նշանակում է՝ Միացյալ Նահանգները գնաց Սյունիք, բառացի դա է նշանակում։ Դա պատասխան է Ալիևին, Թուրքիային, որ հանկարծ որևէ բան չշշկռվեն այս ուղղությամբ, ինչքան էլ ուզում է՝ հայտարարություններ անեն։

Հարցազրույցն ամբողջությամբ՝ տեսանյութում։

Գարիկ Հարությունյան