14.12.2024 | 12:52
NYMEX. Թանկարժեք մետաղների գները նվազել են
Ասում ենք՝ 7 շրջան տալիս ենք, Ադրբեջանն ավելին է ուզում. Փաշինյանը մեջբերեց Սերժ Սարգսյանի խոսքերը. ՏԵՍԱՆՅՈՒԹ
Քաղաքականություն
14.04.2021 | 11:16
Ադրբեջանը շատ հստակ ու հրապարակային ընդգծել է, որ պատրաստ չէ ընդունել Լեռնային Ղարաբաղի որևէ կարգավիճակ, որը նույնը կլինի կամ մի փոքր բարձր կլինի ինքնավար մարզի կարգավիճակից: Այս մասին խորհրդարանում հայտարարեց ՀՀ վարչապետ Նիկոլ Փաշինյանը՝ խոսելով ԼՂ հիմնախնդրի մասին:
Փաշինյանը հիշեցրեց, որ պատերազմի առաջին օրը խորհրդարանում պատգամավորներին հարցրել է՝ ինչ պետք է անեինք նման իրավիճակից խուսափելու համար:
«Մենք Լեռնային Ղարաբաղի հարցի կարգավորումը ժառանգել ենք փակուղային, նախապատերազմական և հետպատերազմական վիճակում: Ի՞նչ հիմքեր ունեմ նման պնդում անելու: Այս մասին են վկայում 2018-ի ապրիլի 17-ին այս ամբիոնից Սերժ Սարգսյանի արած երկու հայտարարությունները: Այդ օրը Սերժ Սարգսյանն ասել է՝ բանակցային գործընթացը լավատեսություն չի ներշնչում: Ավելի հստակ ասած՝ այն ուղղակի կանգնած է, որովհետև դրանց արդյունքից Ադրբեջանի ղեկավարության սպասելիքներն անիրատեսական են, անընդունելի՝ մեզ համար:
Այդ նույն օրը Սամվել Նիկոյանի հարցին ի պատասխան՝ Սարգսյանը հայտարարել է. «Նախ՝ պետք է ասեմ, որ ապրիլյան պատերազմը և անակնկալ էր, և անակնկալ չէր այն առումով, որ շատ դեպքերում մարդիկ գրեթե համոզված են ինչ-որ բանում, բայց ներսում հույս են փայփայում, որ հակառակորդը կամ գործընկերը չի գնա քայլերի, որոնք վնասակար են երկու կողի համար էլ: Այս առումով մենք դաս պետք է համարենք, որ բանալի բառը «այլևս»-ն է: Այս առումով մենք դաս առաջին պետք է համարենք այն, որ այլևս գոնե շատ տևական ժամանակ երբեք չպետք է հույս փայփայենք, որ Ադրբեջանի ղեկավարությունը թողնելու է իր ուխտադրուժ մոտեցումները, ցանկությունը՝ ուժով լուծելու ԼՂ հիմնախնդիրը»,- Սարգսյանին մեջբերեց Փաշինյանը՝ ընդգծելով՝ ունեցել ենք մի վիճակ, որ բանակցային գործընթացում ՀՀ-ն հասել էր իր կարմիր գծերին և մի բան էլ հատել էր այն:
Բանակցային գործընթացի կարմիր գծերի հատման մասին է վկայում նաև 2016-ի նոյեմբերի 17-ին Սերժ Սարգսյանի ռուսական լրատվական գործակալությանը տված հարցազրույցը, որի ժամանակ Սարգսյանն ասել է. «Մենք մի քանի անգամ մոտ էինք ստորագրելու փաստաթուղթը, որտեղ բոլոր այս սկզբունքները հստակ արտացոլված էին: Այսինքն՝ հայկական կողմերը թողնում էին այն տարածքները, որոնք ներկայումս զբաղեցվախ են որպես անվտանգության գոտի: Այն տարածքները, որոնց մասին ադրբեջանցիներն ասում են օկուպացված, անվանում՝ բռնազավթված ադրբեջանական 7 շրջանները: Թողնում ենք տարածքներն ու հեռանում՝ այսինքն՝ դա տարածքային ամբողջականության սկզբունքն է: Բայց առաջին կետում հստակ գրված էր, որ ԼՂ վերջնական իրավական կարգավիճակը որոշվելու է Արցախի ժողովրդի ազատ կամարտահայտման միջոցով: Այնուհետև գրված էր՝ ով է մասնակցելու, ինչպիսի օրակարգ է և այլն: Լրագրողը հարց է տալիս՝ այսինքն հանրաքվե՞, Սերժ Սարգսյանն ասում է՝ այո՛, հանրաքվե: Հենց դա է եղել ինքնորոշման սկզբունքի մարմնավորումը, բայց ամեն անգամ ադրբեջանական կողմը նոր պահանջներ էր առաջ քաշում:
Այսինքն՝ եկեք արձանագրենք՝ ուր ենք հասել բանակցային գործընթացում: Մենք հասել ենք մի տեղ, որ հայկական կողմն ասում է, որ 7 շրջանները վերադարձնում եմ, իսկ Ադրբեջանն ասում է՝ ո՛չ, ավելին պիտի տաս»:
Սերժ Սարգսյանը իր մեկ այլ հարցազրույցի ժամանակ, որը նա տվել է 2017-ի հունիսի 16-ին «Արմենիա» հեռուստաընկերությանը, նշել է, որ Ապրիլյան պատերազմը ցույց տվեց, որ Ադրբեջանը հրաժարվում է խնդրի լուծման մադրիդյան տարբերակից, և դա հասկանալի արձավ բոլորին: Ադրբեջանի դիրքորոշումն էլ պարզ է՝ նա ասում է, որ ԼՂ խնդիրը Ադրբեջանի ներքին գործն է, այսինքն՝ Ղարաբաղն Ադրբեջանի բաղկացուցիչ մասն է և այդպիսին պետք է շարունակի մնալ»,- մեջբերեց Փաշինյանը՝ ընդգծելով, որ նախկինում Հայաստանը ղեկավարած անձինք հանդես են եկել հայտարարություններով, որոնք հստակ պետք է պարզաբանվեն:
Մանրամասները՝ տեսանյութում:
