11.10.2026 | 18:49
Թրամփը կրկին հայտարարել է, որ Ռուսաստանն ու Ուկրաինան համաձայնության են եկել էներգետիկ հրադադարի շուրջ
Ինչու է ձախողվել 4 մլն դոլարի ներդրումը և ինչու են Հրանտ Բագրատյանին դատի տվել․ ՏԵՍԱՆՅՈՒԹ
Տնտեսություն
26.03.2021 | 20:47
Տավուշի մարզում անասնապահության և այլ ոլորտներում մի քանի ներդրումային խոշոր ծրագրեր չեղարկվել են շրջանառվող կեղծ տեղեկությունների պատճառով, թե մարզի մի քանի գյուղական տարածքներ, իբր, անցնում են Ադրբեջանին: Այս մասին հայտնում է Տավուշի մարզպետ Հայկ Չոբանյանը՝ շեշտելով, որ այժմ փորձում են բանակցությունների միջոցով ներդրողներին հակառակն ապացուցել:
Մարզպետի խոսքով՝ այս խոսակցությունների պատճառով նաև թռչնաբուծական համալիրի կառուցումն է ձախողվել: Չոբանյանն ասաց, որ այս կեղծ տեղեկությունների հետ կապված դատական հայց են ներկայացրել: Նման տեղեկություն էր տարածել նաև Հայաստանի նախկին վարչապետ Հրանտ Բագրատյանը:
Հիշեցնենք՝ Հրանտ Բագրատյանն այս տարվա մարտի 7-ին ֆեյսբուքի իր էջում գրել էր, որ Տավուշի մարզի Ազատամուտ համայնքի արոտավայրեր են եկել ադրբեջանցի զինվորականներ և պահանջել հայ գյուղացիներից՝ հեռանալ այդ տարածքներից, այդտեղ անասնապահությամբ չզբաղվել: Մարզպետն ասաց՝ հայց են ներկայացրել դատարան, որ նմանատիպ տեղեկություն տարածողները պատասխանատվություն կրեն:
Նախկին վարչապետ Հրանտ Բագրատյանը համամիտ չէ պնդմանը, որ իր գրառման պատճառով է ներդրումային ծրագիր ձախողվել: Ասում է՝ Արցախի շրջաներն էլ են թշնամուն անցել, հիմա եթե Արցախից մեզ մնացած հատվածում ներդրումներ չլինեն, ի՞նքն է մեղավոր լինելու:
Այնուհանդերձ, Հրանտ Բագրատյանի ուշադրությունը հրավիրեցինք այն փաստի վրա, որ իր գրառումից 20 օր անց նշված Ազատամուտ համայնքի կամ այլ գյուղերի հարակից տարածքներ թշնամուն չեն անցել:
2021 թվականին Տավուշում ներդրումներ են լինելու գյուղատնտեսության, արդյունաբերության և տուրիզմի ոլորտներում: Մարզպետը վստահեցնում է՝ այս տարի ներդրումները 32 տոկոսով գերազանցում են նախորդ տարի փաստացի իրականացված ծրագրերին: Այս տարի Տավուշում կանխատեսվում է 44 միլիարդ դրամի ներդրում, որից մասնավոր ներդրումները կազմելու են 7 միլիարդ դրամ: Ուշագրավ է, սակայն, որ Հայկ Չոբանյանը չի բացահայտում այն ընկերության անունը, որը պատրաստվում էր մարզում 4 միլիոն դոլարի ներդրում անել:
«Թրանսփարենսի Ինթերնեշնլ» հակակոռուպցիոն կենտրոնի իրավական հարցերով փորձագետ Հայկ Մարտիրոսյանին խնդրեցինք մեկնաբանել՝ հնարավո՞ր է, արդյոք, որ կեղծ տեղեկությունների տարածումը ներդրումային ծրագրերի համար լուրջ խոչընդոտ հանդիսանա:
Փորձագետն ասում է՝ ներդրումների խնդիրը միայն հետպատերազմյա իրավիճակի կամ կորոնավիրուսի համավարակի հետ կապելը ճիշտ չէ, քանի որ դրանց ազդեցությունը թեև կա, բայց շատ քիչ է: Փորձագետը նշում է առանցքային խնդիրները, որոնց պատճառով Հայաստանում ներդրումներ չեն արվում՝ իրավական անորոշություններ, պետական կառավարման անարդյունավետություն, տնտեսության վերաբերյալ ուսումնասիրությունների անորոշ խնդիրներ և այլն։
Մանրամասները՝ տեսանյութում։
Նարեկ Կիրակոսյան
