09.06.2026 | 15:57
Ծառուկյանին թույլ չեն տվել ՀՀ-ից հեռանալ․ խոշոր չափերով հարկերից խուսափելու մեղադրանքով նոր քրեական վարույթ է հարուցվել
ԼՀԿ-ն՝ նոր ԸՕ-ին դե՞մ․ Մարուքյանը 2018-ին անձամբ է կողմ քվեարկել նախագծին. ՏԵՍԱՆՅՈՒԹ
Քաղաքականություն
23.03.2021 | 22:40
Էդմոն Մարուքյանի ղեկավարած «Լուսավոր Հայաստան» կուսակցությունը կտրականապես դեմ է արտահերթ ընտրություններից առաջ Ընտրական օրենսգիրքը փոխելուն: Ընդդիմադիր ուժը սա համարում է որպես գործող խաղի կանոնների փոփոխություն: ԼՀԿ-ից հիմնավորում են՝ երբ Փաշինյանի հետ հունիսի 20-ը որոշել են սահմանել արտահերթ ընտրությունների օր, հաշվի են առել գործող խաղի կանոնները, այն է՝ ընտրությունների գնալ 2016-ին ընդունված օրենսգրքով, որը ենթադրում է ռեյտինգային ընտրական համակարգ: Էդմոն Մարուքյանը հայտարարել է, որ նոր խաղի կանոններն ընդունելը նշանակում է հարվածի տակ դնել ընտրության օրը, խորացնել ճգնաժամը երկրում և, որպես վերջաբան, ԼՀԿ-ից զգուշացնում են՝ իրենք էլ պայմանավորվածություններ կխախտեն:
Հիշեցնենք՝ իշխանությունն ու ընդդիմությունը երկարատև քննարկումների արդյունքում եկել են համաձայնության, որ Փաշինյանի հրաժարականի դեպքում վարչապետ չեն առաջադրելու և գնալու են արտահերթ ընտրությունների: Ըստ էության, Մարուքյանի թիմից ակնարկում են, որ ԸՕ-ի փոփոխության դեպքում իրենք վարչապետի թեկնածու կառաջադրեն:
ԼՀԿ-ից առաջարկում են բաց համամասնական ընտրակարգով գնալ ընտրությունների, որ կուսակցության առաջարկած ցուցակում քաղաքացին կարողանա նշում կատարել և իր ուզած թեկնածուին ընտրել ու գործուղել ԱԺ: Գորգիսյանը պնդում է, թե Փաշինյանը փորձում է օրենսդրությունը հարմարեցնել իրեն:
ԸՕ-ի փոփոխության անհրաժեշտություններից մեկն էլ հեղինակները, այդ թվում՝ ՀԿ ներկայացուցիչները համարում են այն, որ եթե ռեյտինգային ընտրակարգը դուրս գա, ապա օլիգարխները, թաղային հեղինակությունները և այլ ռեսուրսների տիրապետող անհատներ չեն կարողանա ճնշում գործադրել ընտրողների վրա:
Գորգիսյանը, սակայն, համամիտ չէ տեսակետի հետ, որ ռեյտինգային համակարգով խորհրդարանում քրեական հեղինակություններ են հայտնվում: Որպես օրինակ նա բերեց «Իմ քայլը» խմբակցությունը, որի 88 պատգամավորից 44-ը ռեյտինգային համակարգով են ընտրվել, բայց նրանց մեջ հեղինակություն չկա: Հիշեցրեց նաև, որ 2017-ին ոչ միայն Նիկոլ Փաշինյանն է ռեյտինգայինով ընտրվել, այլև ինքը: Այնուհանդերձ, Factor TV-ն Գևորգ Գորգիսյանին հիշեցրեց 2017-ի ընտրություններից դեպքեր, երբ օլիգարխները թաղերում իրենց հեղինակության հաշվին տասնյակ հազարավոր քվեներ էին ապահովում ՀՀԿ-ի համար: Գորգիսյանը հակված է կարծել, որ թաղային հեղինակությունները կարող են կեղծիքների դիմել նաև համամասնական ընտրակարգի ժամանակ:
Նշենք, որ ԼՀԿ-ի կողմից ԸՕ-ի փոփոխություններին կտրականապես դեմ լինելն ինչ-որ առումով տարակուսելի է, քանի որ 2018 թվականի դեկտեմբերի արտահերթ ընտրություններից մեկ-երկու ամիս առաջ՝ հոկտեմբերի 29-ին, ԼՀԿ-ն կողմ էր քվեարկել փոփոխություններին, թեև ՀՀԿ-ի կողմից քվեարկությունը տապալվեց։ Գևորգ Գորգիսյանից հետաքրքրվեցինք՝ ինչու է ԼՀԿ-ն դեմ մի նախագծի, որին երկու անգամ կողմ է քվեարկել:
ԸՕ-ի փոփոխություններին մասնակցած «Իրազեկ քաղաքացիների միավորում» ՀԿ ծրագրերի համակարգող Դանիել Իոաննիսյանը, անդրադառնալով «Լուսավոր Հայաստանի» դիտարկմանը, թե օրենսգրքի փոփոխությունը լեգիտիմության խնդիր կառաջացնի, արձագանքեց՝ ԼՀԿ-ի դիրքորոշումն անհասկանալի է, որովհետև հակասում է 2018 թվականի իրենց իսկ դիրքորոշմանը։
«Բարգավաճ Հայաստան»-ից արդեն մի քանի անգամ են վերահաստատում՝ իրենց համար ընդունելի է ընտրակարգի ցանկացած մոդել: Գագիկ Ծառուկյանի ղեկավարած ուժից, սակայն, մտահոգություններ են հայտնում՝ հանկարծ իշխանությունները չփորձեն ԸՕ-ի փոփոխությունների պատճառաբանությամբ տեղափոխել արտահերթ ընտրության օրը:
Իշխող «Իմ քայլը», որը ԸՕ-ն փոխելու մենաշնորհ ունի, հակված է ամբողջապես համամասնական համակարգին անցում կատարելուն, և միայն այդ դեպքում արտահերթ ընտրությունների գնալուն: Խմբակցության ղեկավար Լիլիթ Մակունցը շեշտում է՝ այս պահին քննարկումներ են ընթանում։
Հստակեցնող հարցին՝ հնարավո՞ր է միայն համամասնականի հետ կապված դրույթը փոխվի, Մակունցը պատասխանեց, որ այս պահին վերջնական ձևակերպում չկա, բայց ոչինչ չի բացառում:
Փաշինյանի թիմից մեկ այլ ներկայացուցիչ Ալեն Սիմոնյանն էլ, ի պատասխան Մարուքյանի՝ խաղի կանոնները փոխելու հայտարարությանը, նշում է, որ իշխանությունները որևէ մեկին չեն խաբել, քանի որ 2018 թվականից ԸՕ-ի փոփոխություններ են նախաձեռնել: Սիմոնյանն ակնարկում է, որ Ընտրական օրենսգրքի փոփոխություններից հետո են գնալու արտահերթ ընտրությունների:
Հիշեցնենք՝ Ընտրական օրենսգրքի նախագիծը շրջանառության դրվել է մարտին և դեռ լիագումար նիստերի օրակարգ չի ընդգրկվել: ԼՀԿ-ից վստահեցնում են՝ իշխանության հետ ԸՕ-ի շուրջ քննարկումներ չկան՝ բացառությամբ հրապարակային հեռակա հայտարարությունների: Չի բացառվում, որ ԸՕ-ի շուրջ քննարկումները նոր ճգնաժամի պատճառ դառնան:
Մանրամասները՝ տեսանյութում։
Նարեկ Կիրակոսյան
