09.06.2026 | 23:19
Կանանց Հայաստանի հավաքականը 0:6 հաշվով պարտվեց Բելառուսին. ՏԵՍԱՆՅՈՒԹ
Երևանն ու Բաքուն վիճում են 140 ռազմագերիների վերադարձի պահանջի շուրջ․ ՌԲԿ-ի անդրադարձը
Քաղաքականություն
29.01.2021 | 15:21
Ադրբեջանում պահվող հայ գերիների խնդրին է անդրադարձել ռուսական ՌԲԿ-ն՝ հիշեցնելով, որ Լեռնային Ղարաբաղում հրադադարի հաստատման մասին նոյեմբերի 10-ի եռակողմ հայտարարության 8-րդ կետի համաձայն՝ Հայաստանն ու Ադրբեջանը պիտի իրականացնեն ռազմագերիների և պահվող այլ անձանց ու զոհվածների մարմինների փոխանակում։
«Ադրբեջանը ստացել է իր բոլոր զինծառայողներին, որը հաստատում են ինչպես հակամարտության կողմերը, այնպես էլ Ռուսաստանը։ Սակայն հայկական կողմի ցուցակում փոխանակման համար ավելի քան 140 անուն կա»,- այս մասին ՌԲԿ-ին հայտնել է ռուսական դիվանագիտական աղբյուրը, ինչը հաստատել է նաև հայկական կողմից տեղեկացված աղբյուրը։
ՌԲԿ-ի հարցմանն ի պատասխան՝ Հայաստանի ԱԳՆ-ն գերիների ստույգ թիվ չի հայտնել՝ վկայակոչելով տեղեկատվության փակ բնույթը։
Ադրբեջանն էլ պնդում է, որ իր մոտ պահվող անձինք փոխանակման ենթակա չեն, քանի որ ռազմական գործողությունների ավարտից հետո են գերեվարվել, իսկ մյուսները մեղադրվում են երեք հոդվածներով՝ «Վարձկանություն», «Ահաբեկչություն», «Ռազմական հանցագործություններ», հայտնել են Ադրբեջանի ԱԳՆ-ից։
Գործակալությանն այստեղ ասել են նաև, որ պայմանավորվածությունների համաձայն՝ Երևանին փոխանցվել է 60 հոգի։
Լրատվամիջոցը գրում է, որ չնայած այս հայտարարությանը՝ հունվարի 28-ին Ռուսաստանի միջնորդությամբ Ադրբեջանից Հայաստան է վերադարձել 5 գերի։
Փոխանակման հայկական ցուցակը ներառում է 62 անձի, որոնք գերի են վերցվել Խծաբերդ գյուղում արդեն պատերազմի ավարտից հետո՝ դեկտեմբերի կեսերին։ Հայկական կողմը պնդում է, որ այս ու հարակից գյուղերը նոյեմբերի 10-ի հրադադարի հայտարարության կնքման պահին իր վերահոսկողության տակ են եղել։
Խծաբերդի հայ գերիների մասով ռուսական լրատվամիջոցին Ադրբեջանի ԱԳՆ-ից ասել են հետևյալը․«Նրանք Ադրբեջանի տարածք են ուղարկվել 2020թ․ նոյեմբերի վերջին՝ եռակողմ հայտարարության ստորագրումից ավելի քան 2 շաբաթ հետո։ Ահաբեկչական գործունեության արդյունքում այդ խմբի կողմից սպանվել ու վիրավորվել են մեր զինծառայողներն ու քաղաքացիական անձինք։ Ինչպես նախատեսվում է Ադրբեջանի օրենսդրությամբ՝ նրանց դեմ քրեական գործ է հարուցվել»։
Մյուս գերիների մասով գերատեսչությունից հայտնել են, որ նրանց ևս մտադիր չեն հանձնել։
«Ներկայում ադրբեջանական կողմում գտնվում են մի քանի անձինք, այդ թվում՝ 3-րդ երկրների քաղաքացիներ, որոնց նկատմամբ քրեական գործեր են հարուցվել «Վարձկանություն», «Ահաբեկչություն», «Ռազմական հանցագործություններ» հոդվածներով։ Համաձայն միջազգային հումանիտար իրավունքի, այդ թվում՝ Ժնևյան կոնվենցիաների, նրանք հանձնման ենթակա չեն»,- ասվում է Ադրբեջանի ԱԳՆ-ի պատասխանում։
Երևանում այս ամենի հետ կտրականապես համաձայն չեն։
«Ադրբեջանը շահարկում է հայ գերիների ցուցակը և հրաժարվում ընդունել հայ զինծառայողների պահման փաստը՝ նույնիսկ սոցցանցերում ադրբեջանցի օգտատերերի կողմից հրապարակված տեսանյութերի ու ապացույցների առկայության դեպքում։ Ավելին, Ադրբեջանը որոշ ռազմագերիների ներկայացնում է որպես հանցագործներ և նրանց դեմ քրեական գործեր կարում՝ շինծու մեղադրանքներով»,- ՌԲԿ-ին հայտնել են Հայաստանի ԱԳՆ-ից։
«Հայաստանը կատարել է իր պարտավորությունները ռազմագերիների փոխանակման վերաբերյալ՝ «բոլորը բոլորի դիմաց» սկզբունքով։ Այսօրվա դրությամբ՝ բոլոր ադրբեջանցի ռազմագերիները, պատանդները և այլ պահվող անձինք արդեն փոխանցվել են ադրբեջանական կողմին»,- հավելել են Հայաստանի ԱԳՆ-ում։
Էմմա Չոբանյան
