«Եթե դուք չեք կարող գնալ Եվրոպա, Եվրոպան բերեք ձեզ մոտ». Պյոտր Սվիտալսկի

Հայաստանի հետ վիզաների ազատականացման հարցը ԵՄ-ի օրակարգից հանված չէ, բայց այնքան էլ մոտ հեռանկարում չէ․ այս մասին «ԵՄ-Հայաստան հարաբերությունները և հեռանկարները» թեմայով` Գլոբալիցազիայի և տարածաշրջանային համագործակցության վերլուծական կենտրոնի նախաձեռնած գիտաժողովի ժամանակ ասաց ՀՀ-ում ԵՄ դեսպան Պյոտր Սվիտալսկին։

«Բոլոր դեպքերում ՀՀ-ն ինքը պետք է պատրաստվի այդ փոփոխությանը: Օրինակ՝ ընտանեկան բռնության վերաբերյալ օրենքը պետք է ընդունվեր դեռ նախորդ տարի, ինչպես հավաստիացնում էին իշխանությունները, սակայն չարվեց: Ուստի, եթե խոսք է լինում վիզաների ազատականացման մասին, այս կարգի օրենսդրական փոփոխությունները պարտադիր են: Եվ եթե դուք չեք կարող գնալ Եվրոպա, Եվրոպան բերեք ձեզ մոտ»,- ասաց դեսպանը:

Գիտաժողովին մասնակցող տնտեսագետ, ՀԱԿ անդամ Վահագն Խաչատրյանը հարց ուղղեց տնտեսական զարգացման և ներդրումների փոխնախարար Գարեգին Մելքոնյանին, թե արդյոք Հայաստանը սահմանափակում ունի որևէ երկրի հետ տնտեսական, քաղաքական համաձայնագիր կնքելու: Փոխնախարարը պատասխանեց, որ միջազգային պայմանագրեր կնքելիս որոշակի սահմանափակումներ կան` պայմանավորված ԵԱՏՄ անդամակցությամբ։

 «Սահմանափակումը կապված է ազատ առևտրի համաձայնագրեր կնքելու հետ, եթե ազատ առևտրի համաձայնագիրը կնքվում է տվյալ միության կողմից, ապա այն պետք է լինի ԵԱՏՄ-ի անունից»,- ասաց Մելքոնյանը՝ հավելելով, որ նույնն է նաև ԵՄ անդամ երկրների պարագայում:

«Գլոբալիցազիայի և տարածաշրջանային համագործակցության վերլուծական կենտրոնի» նախագահ Ստեփան Գրիգորյանն էլ նկատեց, որ որևէ մեկը չի ասում, թե պետք է խզել կապերը ՌԴ-ի հետ․ «Նման խելառ չկա Հայաստանում, պարզապես պետք է այնպիսի քաղաքականություն տանել, որ ՌԴ-ի հետ համագործակցությունը չդառնա ՀՀ-ԵՄ հարաբերությունների ավարտ»:

Արձագանքելով այս նկատառմանը՝ «Կովկաս» ինստիտուտի նախագահ Ալեքսանդր Իսկանդարյանը հիշեցրեց ԼՂ հակամարտությունը և տարածաշրջանում Հայաստանի դիրքը. «Երկրի անվտանգությունը գերակա է մեզ համար, չի կարող երկրորդային լինել, 2013 թվականի սեպտեբերի 3-ի Սերժ Սարգսյանի հայտարարությունը չէր նշանակում, որ ՀՀ-ն չի շարունակում իր հարաբերությունները ԵՄ-ի հետ»:

Քաղաքագետը նկատեց, որ ԵՄ-ն չի կարող «կոշտ անվտանգություն» ապահովել Հայաստանի համար: Ըստ նրա՝ ՆԱՏՕ-ի կեցվածքն արդեն իսկ հայտնի է 2008-ի ռուս-վրացական պատերազմի ժամանակվանից։  «Եվրոպացիները մեզ համարում են չափից ավելի ռուսամետ, իսկ ռուսները` չափից ավելի եվրոպամետ, ավելի հավասարակշռված վիճակի է պետք հասնել»,- եզրափակեց քաղաքագետը:

Սեդա Ղուկասյան