22.06.2026 | 14:47
Փրկարարները 8-րդ օրը գետում գտան 13-ամյա աղջկա մարմինը
ԵԱՀԿ հատուկ ներկայացուցիչը հայտարարել է Ուկրաինային ԵՄ-ի և ՆԱՏՕ-ի անդամակցությանը նախապատրաստելու ծրագրի մասին
Քաղաքականություն
12.12.2024 | 13:44
Ուկրաինայում ԵԱՀԿ հատուկ ներկայացուցիչ նշանակված չեխ դիվանագետ Պետր Մարեշը հայտարարել է Կիևին ԵՄ-ի և ՆԱՏՕ-ի անդամակցությանը նախապատրաստելու մտադրության մասին։ «Известия»-ին տված հարցազրույցում Մարեշը նշել է, որ ինքը չի զբաղվելու ռազմական տեխնիկայի մատակարարմամբ, այլ կենտրոնանալու է Ուկրաինային եվրոպական և անդրատլանտյան կառույցներին ինտեգրմանը նախապատրաստելու վրա։
Պետր Մարեշը նաև հանդես է եկել Ուկրաինայում ԵԱՀԿ առաքելության երկարաձգման օգտին, որը գործում էր 2014 թվականից և դադարեցվել է 2022 թվականին։ Նրա խոսքով՝ ուկրաինական կողմի խնդրանքով ինքը կվերահսկի ավելի քան 20 նախագծեր։ Այս պաշտոնը հաստատելու որոշումը կայացվել է աշխատանքային ընթրիքի ժամանակ ԵԱՀԿ 55 մասնակից երկրների ներկայացուցիչների մասնակցությամբ՝ առանց Ռուսաստանի համաձայնության, որը չի աջակցում կազմակերպության կառուցվածքում նման պաշտոնի հայտնվելուն։
Դեկտեմբերի սկզբին ԵՄ արտաքին գործերի և անվտանգության քաղաքականության գերագույն ներկայացուցիչ Կայա Կալլասը թույլատվել է եվրոպական երկրներին ռազմական անձնակազմ ուղարկել Ուկրաինա։
Ըստ Կալլասի՝ ԵՄ-ն կարող է «խաղալ իր դերը», եթե ուկրաինական հակամարտության կողմերը համաձայնության գան հրադադարի շուրջ: Միաժամանակ, եվրահանձնակատարն ընդգծել է, որ «այդ հարցում ընտրությունը, ամեն դեպքում, մնում է Ուկրաինային»։
Նախկինում նման տեսակետ էր հնչեցրել ԱՄՆ նախագահի ազգային անվտանգության հարցերով խորհրդական Ջեյք Սալիվանը։ CNN-ին տված հարցազրույցում նա ասել էր, որ Ուկրաինան ինքը պետք է որոշի իր դիրքորոշումը տարածքային զիջումների հարցում։
Թարգմանությունը՝ Տաթև Ֆռանգյանի
