26.05.2026 | 13:27
Հարի Քեյնը կարժանանա «Ոսկե խաղակոշիկին»․ անգլիացու բոլոր գոլերը՝ մեկ տեսաշարով․ ՏԵՍԱՆՅՈՒԹ
Խաղաղության պայմանագրի 2 կետում բաց հարցեր ունենք․ Ադրբեջանի ԱԳ նախարար
Քաղաքականություն
12.12.2024 | 13:35
Ադրբեջանն ու Հայաստանը դեռևս վերջնական համաձայնության չեն եկել խաղաղության պայմանագրի նախագծի շուրջ, բանակցությունները շարունակվում են։ Այս մասին ադրբեջանական լրատվամիջոցներին հայտարարել է Ադրբեջանի ԱԳ նախարար Ջեյհուն Բայրամովը։
Նա նշել է,որ խաղաղության պայմանագրի նախագիծը բաղկացած է 17 հոդվածից և նախաբանից։
«Նախաբանի տեքստը և 15 կետերը գրեթե ամբողջությամբ համաձայնեցված են, իսկ 2 կետում մենք բաց հարցեր ունենք։ Դրանց ուղղությամբ աշխատանքները շարունակվում են։ Արդեն եղել է բանակցությունների և տեքստերի փոխանակման մի քանի փուլ, բայց լիովին համաձայնեցված տարբերակի դեռ չի հաջողվել գալ, աշխատանքը շարունակվում է։ Չնայած այն հանգամանքին, որ բաց հարցեր են մնացել, ակնհայտ առաջընթաց է գրանցվել»,- ասել է Բայրամովը։
Նա կրկին հիշել է ՀՀ Սահմանադրության մասին՝ հերթական անգամ հայտարարելով, թե այն, իբր, տարածքային պահանջներ է պարունակում Ադրբեջանի նկատմամբ, և Բաքուն Երևանից վճռական քայլեր է ակնկալում այդ ուղղությամբ։
«Այս հարցում Հայաստանից վճռական քայլեր ենք ակնկալում։ Այն փաստարկները, որ վերջերս լսել ենք Հայաստանից, չեն կարող բավարարել մեզ։ ՀՀ Սահմանադրական դատարանի՝ վերջերս ընդունած որոշումն ավելի է բարդացրել իրավիճակը, որովհետև հենց ՀՀ Սահմանադրության նախաբանում է հղում արված փաստաթղթին, որը եղել է Հայաստանի անկախացումից հետո, և այն տարածքային պահանջներ է պարունակում Ադրբեջանի նկատմամբ»,- ասել է ադրբեջանցի պաշտոնյան։
Բայրամովը տարածաշրջանում հաղորդակցության ուղիների ապաշրջափակման հետ կապված Հայաստանին գոյություն չունեցող պարտավորություններ է վերագրել։
««Զանգեզուրի միջանցքի» բացումը կախված է Հայաստանի կողմից ստանձնած պարտավորությունների լիարժեք կատարումից։ Երկաթուղու շինարարության հիմնական մասն արդեն ավարտված է, իսկ մյուս մասում աշխատանքներ են տարվում։ Միաժամանակ, Իրանի հետ ձեռք բերված պայմանավորվածության համաձայն՝ շարունակվում է Արաքս գետի վրայով կամրջի կառուցումը։ Այսինքն՝ աշխատանքներ են տարվում Իրանի տարածքով Ադրբեջանի արևմտյան սահմանի և Նախիջևանի միջև երթուղու կառուցման ուղղությամբ։ Կարճ երթուղու, այսինքն՝ Հայաստանի տարածքում միջանցքի բացումը կախված է պաշտոնական Երևանի կողմից իր պարտավորությունների կատարումից»,- հայտարարել է Ադրբեջանի ԱԳ նախարարը։
Թարգմանությունը՝ Էմմա Չոբանյանի
