22.06.2026 | 14:47
Փրկարարները 8-րդ օրը գետում գտան 13-ամյա աղջկա մարմինը
Թրամփը Սի Ցզինպինին հրավիրել է իր երդմնակալությանը․ CBS News
Քաղաքականություն
12.12.2024 | 14:23
ԱՄՆ նորընտիր նախագահ Դոնալդ Թրամփը Չինաստանի նախագահ Սի Ցզինպինին հրավիրել է մասնակցելու իր երդմնակալությանը։ Այս մասին CBS News-ին հայտնել են քաջատեղյակ աղբյուրներ։ Նշվում է, որ երդմնակալության պաշտոնյաները պլանավորում են լրացուցիչ օտարերկրյա բարձրաստիճան պաշտոնյաների հրավիրել միջոցառմանը։
Աղբյուրները հայտնել են, որ Թրամփը Սիին հրավիրել է նոյեմբերի սկզբին՝ ընտրություններից անմիջապես հետո, սակայն պարզ չէ՝ արդյո՞ք նա ընդունել է հրավերը։ Վաշինգտոնում Չինաստանի դեսպանատան խոսնակն անմիջապես չի մեկնաբանել։
Թրամփի թիմը քննարկում է երդմնակալությանն աշխարհի այլ առաջնորդների հրավիրելու հնարավորությունը։ Հունգարիայի վարչապետ Վիկտոր Օրբանը, որը դեկտեմբերի 9-ին հանդիպել է Թրամփի հետ Ֆլորիդայի Մար-ա-Լագոյի նստավայրում, «դիտարկում է» հրավերը։
«Համաշխարհային առաջնորդները հերթ են կանգնել նախագահ Թրամփի հետ հանդիպելու համար, քանի որ նրանք գիտեն, որ նա շուտով կվերադառնա իշխանության և կվերականգնի խաղաղությունն ամերիկյան հզորության միջոցով ամբողջ աշխարհում»,- ասել է Թրամփի անցումային փուլի խոսնակ Կարոլայն Լևիթը:
Լրատվամիջոցը գրում է, որ դեսպանները և այլ դիվանագետներ սովորաբար հրավիրվում են երդմնակալության արարողություններին, սակայն Պետքարտուղարության 1874 թվականի գրառումները ցույց են տալիս, որ օտարերկրյա առաջնորդ երբեք չի մասնակցել արարողությանը:
Թարգմանությունը՝ Էմմա Չոբանյանի
