ԱԺ-ում առաջին ընթերցմամբ ընդունված նոր դատական օրենսգրքի դրույթներից մեկը, որը հնարավորություն է տալիս դատարանին փաստաբանի նկատմամբ դատական սանկցիա կիրառել՝ տուգանք մինչև 100 հազար դրամի չափով, առաջացրել է փաստաբանների դժգոհությունը:
ՓՊ նախագահ Արա Զոհրաբյանը ևս դեմ է այս օրինագծին: ՓՊ-ն հայտարարություն է տարածել, որտեղ ասվում է. «Չի կարելի դատական օրենսգիրք ընդունել՝ առանց փաստաբանների պալատի կարծիքի եւ առաջարկների: Արհամարհանք եմ նկատում մեր հանդեպ: Եթե մեր առաջարկները հաշվի չեն առնում, ի՞նչ անենք, փողոց դուրս գա՞նք: Եթե մենք այդ ճանապարհն ընտրենք, հավատացեք, ավելի թիրախային քայլեր կարող ենք անել»,-նշել է Արա Զոհրաբյանը։
ՓՊ-ի այս հայտարարությանը միացել են 907 փաստաբաններ. «Գործող 1909 փաստաբաններից, ժամը 14.00-ի դրությամբ, հայտարարությանը միացել է 907-ը»,- տեղեկացրեց ՓՊ մամուլի խոսնակ Ծովինար Խաչատրյանը:
Ստորագրահավաքին միացած փաստաբան Հարություն Բաղդասարյանը մեզ հետ զրույցում ասաց, որ եթե այս օրինագիծը վերածվի օրենքի, փաստաբաններն արդեն կոնկրետ քայլերի կգնան. «Դրանով սահմանափակվում է փաստաբանի իրավունքը: Ամեն փաստաբան չէ, որ կարող է այդ գումարները վճարել, նամանավանդ փաստաբանները, որոնք անվճար իրավաբանական օգնություն են ցույց տալիս: Այսպիսով՝ փաստաբանները պետք է լուռ մնան տեսնելով դատավորների անօրինականությունները, որից կտուժի իր պաշտպանյալն ու ի վերջո կտուժի արդարադատությունը: Կարծում եմ, ստորագրած փաստաբանները գործադուլի կդիմեն օրենքի վերածվելու պարագայում: Մեր մասին օրենսդրական ակտ են կայացնում, սահամանափակում են մեր ազատությունն՝ առանց մեզ հետ հարցը քննարկելու»,-նշեց փաստաբանը:
Օրինագծին դեմ է նաև փաստաբան Նորայր Նորիկյանը, նա մեզ հետ զրույցում ասաց, որ սա ոտնձգություն է փաստաբանների ազատության հանդեպ. «Սա նպատակ է հետանդպնում կառավարելի, վերահսկելի դարձնել փաստաբանական համայնքին: Սա խոսում է այն բանի մասին, որ ՀՀ-ն վտանգ է տեսնում անկախ փաստաբանական ինստիտուտի հանդեպ և չի համակերպվում այն մտքի հետ, որ տարեցտարի փաստաբանական համայնքը կայանում է: Խնդիր է դրվել սահամանափակել փաստաբանների գործունեությունը դատական նիստերում, փաստաբանները կաշկանդված են լինելու այս կամ այն դատավորի կամայական որոշումներից, որից տուժելու է արդարադատության գործընթացը: Անկախ պատկերացումներից՝ բոլոր փաստաբաններն էլ պետք է միահամուռ և կտրուկ դիրքորոշում հայտնեն այս հարցի վերաբերյալ և օրենսդիր մարմինն էլ երկրորդ ընթերցմամբ այդ դրույթը հանի դատական օրենսգրքից»,-եզրափակեց փաստաբանը:
Լիլիթ Շաբոյան
