Ինչ է պետք իմանալ կորոնավիրուսի դեմ պատվաստանյութերի ռիսկերի և կողմնակի ազդեցությունների մասին․ DW

Աշխարհում միլիոնավոր մարդիկ հույս ունեն մոտ ապագայում կորոնավիրուսի դեմ պատվաստումներ կատարելու հնարավորություն ստանալ: Միևնույն ժամանակ, շատերը կասկածամտորեն են մոտենում այս հարցին, քանի որ մի կողմից նրանք կցանկանային պաշտպանվել ինֆեկցիաներից, իսկ մյուս կողմից՝ վախենում են պատվաստումների կողմնակի ազդեցություններից:

Մարդիկ մտահոգված են, թե արդյոք այդքան կարճ ժամանակահատվածում մշակված պատվաստանյութերը բավականաչափ անվտանգ են և արդյոք հնարավոր կողմնակի ազդեցությունները բավարար չափով ուսումնասիրվել են, գրում է DW-ի ռուսական ծառայությունը:

Իսկ պատվաստումների նկատմամբ ինչպիսի՞ ռեակցիաներ են նորմալ համարվում, ի՞նչ կողմնակի բարդություններ կարող են առաջանալ: Եվ ընդհանրապես պե՞տք է պատվաստվել:

Նորմալ է համարվում, երբ օրգանիզմը պատվաստանյութին որոշակի կերպով արձագանքում է. ներարկման տեղը կարող է կարմրել, այտուցվել կամ ցավոտ լինել: Պատվաստումից հետո առաջին երեք օրվա ընթացքում մարդը կարող է թուլություն զգալ, կարող է ունենալ ջերմություն, գլխացավ և հոդացավ: Այս ախտանիշները մեղմ են և անհետանում են մի քանի օր անց: Դրանք ցույց են տալիս, որ պատվաստանյութը գործում է, այն խթանում է իմունային համակարգը և ստիպում է օրգանիզմին պաշտպանվել «կեղծ» ինֆեկցիայից, ինչպիսին ընկալվում է պատվաստանյութը:

Պատվաստանյութերի օգտագործումից հետո օրգանիզմում նման ախտանշանների մասին են հայտնել  գերմանական  BioNTech և  ամերիկյան Pfizer , բրիտանական AstraZeneca,  ամերիկյան  Moderna և ռուսական «Արբանյակ V» ընկերությունները:

DW-ն տեղեկացնում է, որ սուր կողմնակի բարդությունները  հազվադեպ են գրանցվել։  Որոշ հազվադեպ դեպքերում պատվաստանյութերն առաջացրել են ծանր կողմնակի բարդություններ, ինչպիսիք են ալերգիկ ցնցումները: Ընդհանուր առմամբ, հավաստագրված պատվաստանյութերը, համաձայն Եվրոպական դեղերի գործակալության (EMA), ամերիկյան FDA- ի և Առողջապահության համաշխարհային կազմակերպության (ԱՀԿ), անվնաս են,  հակառակ դեպքում դրանք չէին հաստատվի օգտագործման համար:

Տաթև Ֆռանգյան