12.10.2026 | 10:49
Կոլումբոսի օրվա կապակցությամբ Հայաստանում ԱՄՆ դեսպանատունը փակ է
Հակասահմանադրական, թե անհրաժեշտ․ կարծիքներ՝ օպերատիվ շտաբ ստեղծելու՝ 13 կուսակցությունների առաջարկի շուրջ. ՏԵՍԱՆՅՈՒԹ
Քաղաքականություն
19.10.2020 | 20:20
Օպերատիվ շտաբ ստեղծելու և այդ հատուկ մարմնին որոշումներ ընդունելու իրավասություններով օժտելու՝ 13 կուսակցությունների պահանջը հակասահմանադրական է, կարծում է «Իմ քայլը» խմբակցության պատգամավոր Հովիկ Աղազարյանը:
Հիշեցնենք՝ անցած շաբաթ Կառավարությանը նման առաջարկով դիմած կուսակցությունների թվում են ՀՅԴ-ն, Սերժ Սարգսյանի ղեկավարած ՀՀԿ-ն, Արթուր Վանեցյանի «Հայրենիքը», «Ժառանգություն»-ը և այլն։ Կուսակցությունները նաև պահանջում են, որ որոշումներ կայացնող շտաբի անդամ լինեն Հայաստանի և Արցախի նախկին և գործող նախագահները, վարչապետները, պաշտպանության և արտաքին գործերի նախարարները, ռազմական և քաղաքական փորձառություն ունեցող այլ անձինք: Ստացվում է՝ եթե ստեղծվի այդ շտաբը, ապա նույն սեղանի շուրջ նստելու են Նիկոլ Փաշինյանը, Ռոբերտ Քոչարյանը, Սերժ Սարգսյանը, Լևոն Տեր-Պետրոսյանը և այլք:
Հովիկ Աղազարյանը մատնանշում է այն անձանց և ինստիտուտները, որոնք Սահմանադրությամբ լիազորված են ռազմական դրության ընթացքում կառավարել երկիրը: Միևնույն ժամանակ, նա ընդունելի է համարում նախկին պաշտոնյաների մասնակցությամբ խորհրդատվական մարմնի ձևավորումը։
13 կուսակցությունների առաջարկին հրապարակային արձագանքել է առաջին նախագահ Լևոն Տեր-Պետրոսյանը։ «Զարմանում եմ, թե ինչպես լուրջ և զանգվածային կուսակցությունների համբավ ունեցող ՀՀԿ-ն և ՀՅԴ-ն կարող էին ընկնել շուրջ մեկ տասնյակ անպատասխանատու մարդ-կուսակցությունների խելքին։ Եթե սա արված է զուտ փիառ նպատակով, ապա այն ընդամենը ձախորդ նախաձեռնություն է։ Այնուամենայնիվ, կարծում եմ, որ հայտարարության նախաձեռնողներն առաջնորդվել են ոչ թե պետական հեղաշրջման նպատակադրմամբ, ինչպես գնահատվում է ոմանց կողմից, այլ Արցախի և Հայաստանի ճակատագրի նկատմամբ ողջ հայ ժողովրդին համակած խորը մտահոգությամբ»,- ասել է Տեր-Պետրոսյանը։
1998-1999 թվականներին ՀՀ վարչապետի պաշտոնը զբաղեցրած Արմեն Դարբինյանը 13 կուսակցությունների առաջարկությունը համարել է անտեղի և վնասակար: Նա նշել է՝ երկիրն ունի ղեկավար, որն ամբողջական պատասխանատվություն է կրում իրավիճակի համար:
Իսկ ահա ՀՀ նախկին վարչապետ և ԱԺ նախկին նախագահ Խոսրով Հարությունյանը, որը նաև նախաձեռնության համահեղինակներից է, այս շրջանում օպերատիվ շտաբի առկայությունն անհրաժեշտություն է համարում: Նա որպես հիմնավորում նշում է Հայաստանի և Արցախի ղեկավարների այն հայտարարությունները, որ օրհասական իրավիճակում ենք գտնվում:
Նախկին վարչապետին զարմացրել են նախաձեռնության մասին իշխանական շրջանակներից հնչող այն մեսիջները, որ սա սահմանադրական կարգի տապալման փորձ է: Խոսրով Հարությունյանը չի բացառում, որ հնարավոր է՝ իրավական առումով բացեր լինեն, սակայն կարծում է՝ քննարկումների արդյունքում կկարգավորվեն:
Գաղափարը ողջունելի է, բայց ընտրված մեխանիզմներն են վտանգավոր, Factor TV-ի հետ զրույցում 13 կուսակցությունների առաջարկի մասին ասաց քաղաքագետ Արմեն Բաղդասարյանը:
Ըստ նրա՝ պատերազմական օրերին պետությունը բոլոր ռեսուրներն օգտագործում է, և ցանկալի կլինի, որ պետական կառավարման ոլորտում մեծ փորձ ունեցող նախկին պաշտոնյաների պոտենցիալը ևս օգտագործվի: Արմեն Բաղդասարյանը, սակայն, ասում է՝ անհասկանալի է, թե ինչու են նախկին պաշտոնյաներն իրենց պոտենցիալ օգնության դիմաց իշխանական ինչ-որ լծակներ պահանջում:
Կառավարությունը կուսակցությունների առաջարկությունը ո՛չ ընդունել, ո՛չ էլ մերժել է: Վարչապետի խոսնակ Մանե Գևորգյանն առաջարկի հնչեցումից ժամեր անց Factor TV-ին փոխանցեց՝ կուսակցությունների առաջարկը Կառավարությունում ի գիտություն են ընդունել, ըստ անհրաժեշտության՝ հայտարարություն կանեն։
Մանրամասները՝ տեսանյութում։
Նարեկ Կիրակոսյան
