Ադրբեջանցի պաշտոնյան հայտարարել է, թե «ՀՀ-ի ռազմականացումը հարկադրել է Բաքվին ավելացնել պաշտպանական ծախսերը»

«Լայնածավալ ռազմականացման քաղաքականությունը, որը վարում է Հայաստանը, անհրաժեշտություն է դարձրել ավելացնել մեր երկրի պաշտպանության և անվտանգության ծախսերը և էլ ավելի բարձրացնել մեր պաշտպանունակությունը», հայտարարել է Ադրբեջանի ֆինանսների նախարար Սամիր Շարիֆովը Միլլի Մեջլիսի տնտեսական քաղաքականության, արդյունաբերության և ձեռներեցության հանձնաժողովի նիստում «Ադրբեջանի Հանրապետության 2025 թվականի պետական ​​բյուջեի մասին» օրինագծի քննարկման ժամանակ։

Շարիֆովը փաստացի հաստատել է ադրբեջանական լրատվամիջոցներում ավելի վաղ տարածված տեղեկությունները, որ 2025 թվականի բյուջեով Ադրբեջանի պաշտպանական և անվտանգային ծախսերն ավելացվելու են՝ կազմելով 8,396,297,596․0 մանաթ (շուրջ 5 մլրդ դոլար)։

Ի սկզբանե այդ ծախսերը նախատեսված էին 6 մլրդ 658 մլն (3,9 մլրդ) մանաթի չափով։ Սակայն ավելի ուշ հայտարարվեց, որ Ադրբեջանի նախագահ Իլհամ Ալիևի հանձնարարությամբ պաշտպանության և անվտանգության ծախսերն ավելացել են 1 մլրդ 738 մլն մանաթով։

Այդ ծախսերի ֆինանսավորումն ապահովվելու է Ադրբեջանի պետական ​​նավթային հիմնադրամից՝ պետբյուջե փոխանցումն ավելացնելով 1 մլրդ 700 մլն մանաթով։

Հաղորդվում է, որ 2025 թվականի ծախսերի կառուցվածքը ներառում է 2 միլիարդ 665,2 միլիոն մանաթ՝ Զինված ուժերի, 467 միլիոն 917 հազար՝ ազգային անվտանգության, 540 միլիոն 314 հազար՝ սահմանապահ ծառայության համար։ Նաև 4 մլրդ 717,4 մլն մանաթ նախատեսված է պաշտպանության և ազգային անվտանգության ոլորտին առնչվող այլ գործունեության համար։

Թարգմանությունը՝ Էմմա Չոբանյանի