Մեկնարկել է ԱԺ պաշտպանության և անվտանգության հարցերի մշտական հանձնաժողովի նիստը։ Օրակարգում Կառավարության կողմից ներկայացված երկու նախագիծ է, որոնցով նախատեսվում է իրականացնել հինգ փոփոխություն:
Հարակից զեկուցող, ԱԺ պատգամավոր Արմեն Խաչատրյանը նախաձեռնությունը համարեց կարևոր, բայց փոքր-ինչ ուշացած, այնուհետև անդրադարձավ հարցի նախապատմությանը:
«ՀՀ օրենքով տեխնիկական զննություն անցնելը պարտադիր բնույթ ունի. սա բխում է Վիեննայի կոնվենցիայից: 2011թ. ոլորտը հանձնվեց մասնավորին, մեծ ներդրումներ եղան, բայց Կառավարության որոշումով այս գործունեությունը վերածվեց աբսուրդի, այսինքն՝ վարչապետ Տիգրան Սարգսյանի օրոք որոշվեց, որ տեխնիկական զննման կտրոնը պարտադիր էր ունենալ, բայց կարող էին տեխզննում չանցնել»,- նշեց Արմեն Խաչատրյանը:
Նշենք նաև, որ հիմնական զեկուցող, տարածքային կառավարման և ենթակառուցվածքների նախարարի տեղակալ Արմեն Սիմոնյանը նշեց, որ քննարկման են ներկայացվել և նախատեսվում է հաստատել Ճանապարհային երթևեկության անվտանգության ապահովման մասին ՀՀ օրենքում փոփոխություններ կատարելու մասին, վարչական իրավախախտումկների վերաբերյալ ՀՀ օրենսգրքում փոփոխություններ և լրացումներ կատարելու մասին, Պետական տուրքի մասին ՀՀ օրենքում փոփոխություն կատարելու մասին, Ավտոտրանսպորտային միջոցների օգտագործումից բխող պարտավորության պարտադիր ապահովագրության մասին ՀՀ օրենքում փոփոխություն կատարելու մասին և ՀՀ հարկային օրենսգրքում փոփոխություն կատարելու մասին նախագծերը:
«Ներկայացվող փոփոխությունները նպատակ են հետապնդում ապահովել ՀՀ ստանձնած միջազգային պարտավորությունների կատարումը։ Տեխնիկական զննության գործընթացի նկատմամբ վերահսկողությունը բարձրացնելու նպատակով առաջարկվում է վերահսկողությունն իրականացնել էլեկտրոնային շտեմարանի և արատորոշման քարտի միջոցով՝ ներկայիս տեխնիկական զննության կտրոնի փոխարեն: Արատորոշման քարտը լրացվում է էլեկտրոնային եղանակով և պահպանվում է էլեկտրոնային շտեմարանում, ինչը հնարավորոթյուն կտա ճանապարհային ոստիկանությանը վերահսկողություն իրականացնել նաև էլեկտրոնային եղանակով՝ առանց տրանսպորտային միջոցը կանգնեցնելու: Փոխվել է տեխնիկական զննության անցկացման պարբերականությունը. առաջարկվում է առաջին տեխնկական զննությունն անցկացնել թողարկման 4-րդ տարում, մինչև թողարկման 10 տարին՝ 2 տարին մեկ անգամ, իսկ 10 տարուց բարձր՝ տարին մեկ անգամ պարբերականությամբ: Ուղևորափոխադրումներում ներգրավված տրանսպորտային միջոցները տեխնիկական զննություն կանցնեն՝ մինչև 10 տարեկանները՝ տարին մեկ, իսկ 10-ից բարձրը՝ տարեկան 2 անգամ պարբերականությամբ: Սահմանվել է վարչական պատասխանատվություն օրենսդրությամբ սահմանված դեպքերում և կարգով տեխնիկական զննում չանցած տրանսպորտայի միջոց վարելու և առանց տեխնիկանան զննում անցկացնելու կամ տեխնիկական անսարքություն ունեցող տրանսպորտային միջոցը տեխնիկապես սարքին ճանաչելու համար՝ ընդհուպ լիցենզիայի դադարեցմամբ»,- նշեց Ա․Սիմոնյանը:
Մանրամասները՝ տեսանյութում:
