Հնդիկները չեղարկում են Թուրքիայի և Ադրբեջանի հանգստավայրերում ծրագրած արձակուրդները՝ Պակիստանին այս երկրների աջակցության պատճառով

Հնդիկները չեղարկում են Թուրքիայի և Ադրբեջանի հայտնի հանգստավայրերում ծրագրած արձակուրդները, քանի որ այս երկրներն աջակցել են Պակիստանին Նյու Դելիի հետ վերջին հակամարտության ժամանակ: Այս մասին հայտնել են երկու տուրիստական ամրագրման ընկերություններ, գրում է Reuters-ը, որին վկայակոչում է ekathimerini-ին։

Հնդկաստանի և Պակիստանի միջև հարաբերությունները կտրուկ վատթարացել են անցյալ ամիս հնդկական Քաշմիրում տեղի ունեցած մահացու հարձակումից հետո, որը, ըստ Նյու Դելիի, աջակցվել է Իսլամաբադի կողմից։ Պակիստանը հերքել է իր մասնակցությունը, սակայն ինտենսիվ մարտեր են սկսվել, երբ Հնդկաստանն անցյալ շաբաթ հարվածել էր Պակիստանում գտնվող թիրախին, ինչը, ըստ նրա, «ահաբեկչական ճամբարներ» են։ Նրանք շաբաթ օրը համաձայնության են եկել հրադադարի շուրջ, որը մեծ մասամբ պահպանվել է։

Հնդկաստանի ռազմական գործողություններից հետո Իսլամաբադին աջակցության հայտարարություններ են արել Թուրքիան և Ադրբեջանը, որոնք հնդիկների շրջանում հանրաճանաչ բյուջետային հանգստավայրեր են։

«Ադրբեջան և Թուրքիա կատարվող ամրագրումները նվազել են 60%-ով անցած շաբաթվա ընթացքում, իսկ չեղարկումները նույն ժամանակահատվածում աճել են 250%-ով»,- ասել է MakeMyTrip-ի խոսնակը։

EaseMyTrip-ի գլխավոր գործադիր տնօրեն Ռիկանտ Փիթին էլ ասել է, որ հարթակը գրանցել է չեղարկումների 22 տոկոս աճ Թուրքիայի և 30 տոկոս՝ Ադրբեջանի համար «վերջերս ստեղծված աշխարհաքաղաքական լարվածության պատճառով»։

Նա հավելել է, որ ճանապարհորդները տեղափոխվել են Հունաստան, Վրաստան, Սերբիա, Թաիլանդ և Վիետնամ։

Տոմսերի վաճառքի մեկ այլ հարթակ՝ ixigo-ն, ավելի վաղ X-ում գրառմամբ հայտնել էր, որ դադարեցնում է ավիատոմսերի և հյուրանոցների ամրագրումները դեպի Թուրքիա, Ադրբեջան և Չինաստան։

«Երբ այս երկրները բացահայտորեն աջակցում են Պակիստանին, պե՞տք է մենք խթանենք նրանց զբոսաշրջությունն ու տնտեսությունը»,- ասել է Փիթին։

Հիշեցնենք, որ Պակիստանի նկատմամբ իրականացված Սինդուր ռազմական գործողությունը Թուրքիան ու Ադրբեջանը դատապարտել էին։ Երկու երկրների ԱԳ նախարարությունները հայտարարություն էին տարածել։

Այսօր էլ Պակիստանի Իսլամական Հանրապետության վարչապետ Մուհամմադ Շահբազ Շարիֆը զանգահարել է Ադրբեջանի  նախագահ Իլհամ Ալիևին և երախտագիտություն  հայտնել ճգնաժամի ընթացքում Ադրբեջանի կողմից ցուցաբերված դիվանագիտական ​​և քաղաքական աջակցության և Պակիստանի ժողովրդի հետ համերաշխության համար։ նա նշել է, որ դա մեր երկրների միջև« եղբայրական հարաբերությունների օրինակ է»։

Թարգմանությունը՝ Էմմա Չոբանյանի