29.04.2026 | 23:40
Հայաստան–ՄԱԿ համագործակցություն․ ուշադրության կենտրոնում՝ խոցելի խմբերի պաշտպանությունը
Ո՞րն է լինելու ԱԺ-ում հնչած սեռական հայհոյանքների հետևանքը. Լևոն Քոչարյանը և Արսեն Թորոսյանը զղջման խոսքեր չեն ասում․ ՏԵՍԱՆՅՈՒԹ
Քաղաքականություն
15.05.2025 | 22:00
Երեկ հայհոյանքների տեղատարափից հետո այսօր խորհրդարանում հարաբերական կայուն իրավիճակ էր։
Պապին թուրք ասողներին հայհոյող Լևոն Քոչարյանն այսօր աշխատանքի չէր եկել՝ չնայած ԱԺ-ն արտահերթ նիստ էր հրավիրել։ Միայն պատգամավոր Քոչարյանի աշխատասենյակի դուռը չէ, որ կողպված էր, «Հայաստան» խմբակցության շատ այլ պատգամավորներ ԱԺ-ում չէին։
Երեկ Լևոն Քոչարյանը հայհոյանքով արձագանքում էր ԱԺ նախագահի տեղակալ Հակոբ Արշակյանի մի ելույթին, որում ՔՊ-ականը Ռոբերտ Քոչարյանի հոր ազգության վերաբերյալ հայտարարություն էր անում՝ հղում անելով ժողովրդին։
Արշակյանի ելույթից րոպեներ առաջ էլ, կրկին ժողովրդին հղում անելով, Քոչարյանն էր Փաշինյանին դավաճան ասել։
Ընդդիմադիր պատգամավորի ելույթը հաջորդում էր մեկ շաբաթից ավելի ԱԺ-ում ընթացող այն քննարկումներին, թե Ռոբերտ Քոչարյանն ու ընտանիքն ապօրինի ծագման ինչ գույքեր ունեն, և որ ժողովրդի կողմից դրանք բռնագանձելու պահանջ կա։
Լևոն Քոչարյանի և Հակոբ Արշակյանի ելույթներին հաջորդած քաշքշուկից հետո էլ երեկ կրքերն ԱԺ-ում չհանդարտվեցին։ Արդեն քոչարյանական թևի բացայակության պայմաններում էին իշխանականները սուր ելույթներ ունենում։ Արսեն Թորոսյանը նույնիսկ հասավ ԱԺ ամբիոնից հայհոյելուն։
Իշխանական և ընդդիմադիր պատգամավորների կողմից հնչեցված հայհոյանքներից հետո ո՞րը պետք է լինի Արսեն Թորոսյանի և Լևոն Քոչարյանի քաղաքական պատասխանատվությունը։ Factor TV-ին ԱԺ միջանցքում հանդիպած «Հայաստան» խմբակցության պատգամավոր Էլինար Վարդանյանը հրաժարվեց պատասխանել Լևոն Քոչարյանի վարքի հետ կապված որևէ հարցի։
«Հայաստան» խմբակցությունից մեկ այլ պատգամավոր՝ Արմեն Ռուստամյանը, թեեև երեկ ԱԺ-ում տեղի ունեցածն այլանդակություն է որակում, բայց ո՛չ իր թիմակից Լևոն Քոչարյանի պահվածքը։ Ռուստամյանը զարմացած է, իր բնորոշմամբ, Լևոն Քոչարյանի կողմից զսպվածության դրսևորումից։
Լևոն Քոչարյանի մանդատը վայր դնելու հիմքեր Արմեն Ռուստամյանը չի տեսնում։
Դաշնակցական Արմեն Ռուստամյանից ոչ պակաս համառությամբ ՔՊ-ական Վահագն Ալեքսանյանն է պաշտպանում իր թիմակից Արսեն Թորոսյանին։ Յոթ հարկանի հայհոյանք հնչեցրած Թորոսյանը, լինելով ժողովրդավար ներկայացող իշխանության անդամ, 24 ժամ անց ո՛չ ներողություն է խնդրել, ո՛չ ափսոսանքի խոսքեր հայտնել։
ՔՊ-ական մեկ այլ պատգամավոր՝ Նարեկ Գրիգորյանն ավելի հեռուն է գնում՝ ողջունելով Թորոսյանի հայհոյախառն ելույթը։
Հաշվի առնելով ՔՊ-ականների դիրքավորումները, ակնհայտ է, որ Արսեն Թորոսյանը հանրապետության ամենաբարձր ամբիոնից հրապարակայնորեն հնչեցրած հայհոյանքի համար քաղաքական պատասխանատվություն չի կրի։
Մանրամասները՝ տեսանյութում։
Նարեկ Կիրակոսյան
