07.06.2026 | 15:55
Կիևը դիմել է ՄԱԳԱՏԷ-ին Չեռնոբոլիսի ԱԷԿ-ի միջուկային վառելիքի պահեստին ռուսական հարվածի հարցով
Հայաստանում տնտեսությունն ավելի ազատ է, քան Թուրքիայում և Ռուսաստանում․ հայտնի են «Տնտեսական ազատության ինդեքս 2020»-ի արդյունքները
Տնտեսություն
30.07.2020 | 20:10
Հրապարակվել են Heritage Foundation-ի «Տնտեսական ազատության ինդեքս» ամենամյա հետազոտության՝ 2020 թվականի արդյունքները։ Ներկայացված տվյալների համաձայն՝ այս տարի Հայաստանը 180 երկրների շարքում 34-րդ տեղում է։ Այն իր ցուցանիշները բարելավել է 2․9 միավորով։
Հայաստանում տնտեսական ազատության վարկանիշային միավորը 70․6 է։ Ուսումնասիրության մեջ հաշվի առնված 12 բաղադրիչներից Հայաստանի ցուցանիշները դրական տեղաշարժ են արձանագրել հետևյալ կետերում․ ունեցվածքի իրավունք, դատական արդյունավետություն, կառավարության բարեխղճություն, հարկային բեռ, կառավարության ծախսեր, բիզնեսի ազատություն և աշխատանքի ազատություն։
Հետազոտության մեջ նշվում է, որ վերջին 15 տարում Հայաստանում տնտեսական ազատությունը բավականին կայուն է:
«Անցած երկու տարում հատկապես կայուն էր ՀՆԱ-ի աճը, քանի որ տնտեսությունը 2015–2016 թվականների տարածաշրջանային դանդաղեցումից հետո վերականգնվել է: Կառավարությունը գնում է կառուցվածքային բարեփոխումների, արտահանման խթանման և ավելի մեծ օտարերկրյա ներդրումների ճանապարհով՝ հետագա տնտեսական աճը մեծացնելու նպատակով»,- նշված է «Տնտեսական ազատության ինդեքս»-ում։
Հավելենք՝ վարկանիշային աղյուսակում առաջատարները Սինգապուրը, Հոնկոնգը և Նոր Զելանդիան են։ Հարևան Վրաստանը 12-րդ հորիզոնականում է, Ադրբեջանը՝ 44-րդ, իսկ Թուրքիան և Ռուսաստանը տնտեսական ազատությամբ զիջում են Հայաստանին՝ զբաղեցնելով, համապատասխանաբար, 71-րդ և 94-րդ հորիզոնականները։
Տարածաշրջանի ամենացածր ցուցանիշները Իրանն է գրանցել՝ հայտնվելով 164-րդ հորիզոնականում։
Նելլի Մելքոնյան
