Ամուլսարի հանքի շահագործումը վտանգելու է ջրի որակը. դատարանում ներկայացվեց այլընտրանքային փորձաքննական եզրակացություն

Ամուլսարում ոսկու արդյունահանման դեմ պայքարող քաղաքացիները, բնապահպան ՀԿ-ների ներկայացուցիչներն ու ակտիվիստները այսօր մի կերպ տեղավորվել էին վարչական դատարանի նեղ սենյակում, հետևում էին հերթական դատական նիստին: Այսօրվա նիստը ընդամենը մեկ դրվագ է երկամյա դատական պայքարի: Գնդեվազ գյուղի բնակիչները վիճարկում են բնապահպանության և էներգետիկայի նախարարությունների կայացրած որոշումներն ու փորձաքննական եզրակացությունները:

Այդ փաստաթղթերը հանքի շահագործման իրավական հիմքն են: Ըստ դրանց, հանքարդյունաբերողի՝ «Լիդիան Արմենիա» ընկերության նախագիծը դրական է գնահատվում, Ամուլսարի հանքի շահագործումը վնասակար չէ շրջակա միջավայրի համար, իսկ հնարավոր վնասները կարելի է շրջանցել: Օրինակ, կարելի է Կարմիր գրքում գրանցված բույսերն ու կենդանիներին տեղափոխել այլ վայրեր և այնտեղ աճեցնել, կամ բազմացնել:

Ըստ բնապահպան Արթուր Գրիգորյանի, սա հակասում է օրենքին, որով սահմանված է ոչ միայն կենդանիների և բուսատեսակների պահպանություն, այլ նաև դրանց տարածման վայրերի: 8 գնդեվազցի հայցվորներին ներկայացնում է համայնքի բնակիչ, լրագրող Թեհմինե Ենոքյանը: Նա դատարանից մեծ ակնկալիքներ չունի, քանի որ, ըստ նրա, Վարչական դատարանը չի կարողանում կառավարությանը հակառակ որոշումներ ընդունել:

Այսօրվա դատական նիստի ժամանակ գնդեվազցիների շահերը պաշտպանող փաստաբան Հայկ Ալումյանը ներկայացրեց մասնագիտական կարծիք Ամուլսարի ոսկու հանքավայրի նախագծի վերաբերյալ, որը պատվիրել է սփյուռքահայ քիմիկոս, էկոլոգիական ինժեներ Հարի Բրոնոզյանը: Ըստ էության, սա կառավարության տված փորձագիտական եզրակացությունների այլընտրանքն է, որի համաձայն «Լիդիան Արմենիայի» նախագիծը չունի պատշաճ բնապահպանական գնահատական: Հանքավայրի շահագործումը բերելու է թթվային և հանքաբեր ապարների գոյացման և արտազտման, որը անգամ հանքավայրի շահագործումից հետո էլ երկար ժամանակ շարունակվելու է և սպառնում է ջրի որակին:

Ուսումնասիրության հեղինակները ավստրալացի գիտնականներն են: Այսպիսով, կա երկու փորձաքննական եզրակացություն՝ կառավարության ներկայացրածը՝ որը դրական է գնահատում «Լիդիան Արմենիայի» նախագիծը և հակառակ բովանդակության փաստաթուղթ, որը ևս գիտականորեն հիմնավորված է: Ըստ Հայկ Ալումյանի, Ամուլսարի պաշտպանների հաջորդ քայլը լինելու է միջնրդությունը՝ դատարանին նշանակել նոր փորձաքննություն, որը կլինի կողմերից անկախ: Դատարանը ժամանակ տվեց կողմերին ծանոթանալու ներկայացված ծավալուն հաշվետվությանը:

Հաջորդ նիստի օրը դեռ նշանակված չէ:

Սյուզան Սիմոնյան