29.04.2024 | 19:46
ՀՀ նախագահն ընդունել է Գնել Սանոսյանին
«Ռեմդեսիվիր» դեղը ստացավ կորոնավիրուսով հիվանդ անձանց բուժելու արտոնություն
Քաղաքականություն
03.05.2020 | 13:17
ԱՄՆ-ի սննդի ու դեղորայքի վարչությունը տվել է էբոլա հիվանդության դեմ կիրառվող «Ռեմդեսիվիր» դեղամիջոցը կորոնավիրուսի դեմ օգտագործելու իրավունք: Սա նշանակում է, որ հակավիրուսային այս դեղամիջոցը կարելի է տալ «Կովիդ-19» սուր հիվանդությամբ տառապող հիվանդներին: Վերջին փորձերը ցույց էին տվել, որ այն կրճատում է ծանր հիվանդների ապաքինման ժամանակահատվածը. հաղորդում է VOA-ն:
Փորձագետներն ասում են, թե էբոլայի դեմ կիրառված «Ռեմդեսիվիրը» չի կարելի համարել «կախարդական փայտիկ» ընդդեմ կորոնավիրուսի: Սակայն ինչպես Սպիտակ տան Օվալաձև սրահում ԱՄՆ-ի նախագահի հետ հանդիպման ժամանակ այս դեղամիջոցն արտադրող «Գիլիդ» ընկերության գոծադիր տնօրեն Դանիել Օդեյն է ասել, դեղամիջոցը կիրառության մեջ դնելու որոշումն առաջին կարևոր քայլն է: Նրա խոսքերով, ընկերությունն իր կողմից մեկուկես միլիոն սրվակ կնվիրաբերի հիվանդանոցներին:
«Ռեմդեսիվիրն» օգտագործվել է էբոլա հիվանդության դեմ, սակայն չի դարձել այն լիովին բուժող միջոց: Ինչպես այն արտադրող ընկերության կայքէջում է գրված. ««Ռեմդեսիվիրը» փորձարարական դեղամիջոց է, որը դեռևս չունի անվտանգության ու արդյունավետության հստակ երաշխիքներ»: Ընկերությունը նաև նախազգուշացնում է, որ դեղամիջոցը կարող է ունենալ կողմնային լուրջ ազդեցություններ:
1063 անձանց վրա իրականացված փորձի արդյուքների համաձայն, այն կարող է արագացնել բուժման ընթացքը ու նույնիսկ օգնել վերակենդանացման բաժանմունքների հիվանդներին, սակայն չկա ապացույց, որ այն կարող է կանխել կորոնավիրուսից մահացությունները:
«Գիլիդ» ընկերությունն առաջարկում է «Ռեմդեսիվիրով» 10 օրվա բուժումներ նշանակել շնչառական սարքերի օգնության կարիք ունեցող անձանց և հնգօրյա բուժում`կորոնավիրուսով ավելի թույլ տեսակները բուժելու դեպքում:
