Երբեք քաղաքականությամբ չեմ զբաղվել. «Իմ քայլ»-ի ցուցակով պատգամավորի թեկնածու եղած դատավորը բացարկ չհայտնեց Քոչարյանի և մյուսների գործով

Հայաստանի երկրորդ նախագահ Ռոբերտ Քոչարյանի և մյուսների գործով նիստին 2 ժամ քննարկվում էր դատավոր Սարգիս Պետրոսյանին բացարկ հայտնել չհայտնելու հարցը:

Պաշտպանները պնդում են, որ բացարկի հիմքեր կան դատավորին, սակայն այս փուլում ներկայացնել չեն կարող. իրենց վստահորդները մեղադրյալի, այսինքն` վարույթի մասնավոր մասնակցի դատավարական կարգավիճակ չունեն, իսկ բացարկ կարող են հայտնել վարույթի մասնակիցները:

Փաստաբան Արամ Վարդևանյանը, այն բանից հետո, երբ հրավիրվել է դատական նիստին, «հրավիրված փաստաբան Արամ Օրբելյան» մակագրությամբ բացարկի միջնորդություն է ներկայացրել դատարանին, որում նշել է դատավոր Սարգիս Պետրոսյանի` 2018 թվականին «Իմ քայլ»-ի ցուցակով պատգամավորության թեկնածու լինելու հանգամանքը:

Հիշեցնենք, որ Քոչարյանի գործը Սարգիս Պետրոսյանին մակագրվելուց հետո Factor TV-ն պարզել էր որ դատավոր Սարգիս Պետրոսյանը 2018-ին « Իմ քայլ»-ի ցուցակով պատգամավորի թեկնածու է եղել:

Դատավորի պնդմանը, թե Վարդևանյանն արդեն իսկ բացարկի միջնորդություն ներկայացրել է դատավորին, ուստի այն պետք է քննարկման առարկա դառնա, Վարդևանյանը պնդեց, թե համապատասխան փուլում է ներկայացնելու այդ միջնորդությունը:

Դատավոր Սարգիս Պետրոսյանը, անդրադառնալով իր` «Իմ քայլ»-ի ցուցակով անցնելու հանգամանքին, նշեց, որ ինքը որպես իրավաբան առաջարկ է ստացել ընդգրկվել ցուցակում, և առաջարկն ընդունել է, սակայն պատգամավոր չի դարձել, ամիսներ անց դադարեցրել է իր անդամակցությունն «Իմ քայլ»-ին:
«Ես երբեք քաղաքականությամբ չեմ զբաղվել»,- հայտարարեց դատավորը:

«Լո՞ւրջ եք ասում»,- տեղից արձագանքեց Ռոբերտ Քոչարյանը` դիտարկելով, որ « Իմ քայլ»-ի ցուցակով պատգամավորի թեկնածու լինելը քաղաքականությամբ զբաղվել է:

Դատավորը բացարկի վերաբերյալ որոշումը հրապարակելիս նշեց, որ մերժում է Արամ Վարդևանյանի` իրեն ներկայացված բացարկի միջնորդությունը:

Արաքս Մամուլյան