Դիմակ ու ձեռնոց՝ հոգեհանգստի սրահ մտնելիս. հոգեհաց կազմակերպել չի հաջողվել

Սգավորին նեցուկ, արցունք թափողի հետ լաց լինող ու նրա վիշտը կիսող մեր ժողովուրդը կարծես ըմբռնումով է մոտենում արտակարգ դրություն հայտարարված այս օրերին հոգեհանգստյան արարողություններին սահմանված նոր կարգը պահպանելուն:

Սգո սրահի պարսպից ներս չմտած, տեսանելի վայրում փակցված է. «Փակ տարածքում 20 հոգուց ավելի մարդկանց ներկայությունը արգելված է»:

Իսկ ահա սգո սրահ մտնելուց առաջ՝ առանձնացված մի փոքրիկ սենյակում, առաջարկում են ձեռքերը ալկոգելով ախտահանել, ձեռնոց ու դիմակ են տրամադրում, ապա թույլ տալիս մտնել հանգուցյալին հրաժեշտ տալու, հարազատներին ցավակցելու:

Հարցին՝ ձեռնոցներն ու դիմակները սգո սրա՞հն է տրամադրում, թե՞ հանգուցյալի հարազատների որոշումն է, պատասխանեցին. «Ո՛չ, սգո սրահն է տրամադրում: Մեզ հատուկ ցուցում է տրված, զգուշացվել ենք թե՛ Ոստիկանության, թե՛ թաղապետարանի կողմից, որ առանց ձեռնոցի ու դիմակի, հատկապես՝ առանց դիմակի, թույլ չտանք մարդիկ սրահ մտնեն»:

Իսկ հսկում են արդյոք, որ դրսում խմբված մարդկանց խմբերը 20 հոգուց չանցնեն, ասաց. «Ոչ, միայն փակ տարածքներին է վերաբերում»:

Հանգուցյալի հարազատների հետ զրուցելիս, պարզվեց, որ չի հաջողվել հոգեհաց կազմակերպել սննդի որևէ օբյեկտում՝ ռեստորանում կամ հոգահանգստի կից սրահում, ինչպես վերջին ժամանակներս ընդունված է անել. «Չհամաձյանեցին ոչ մի կերպ, ասեցին 20 հոգուց ավելի չի կարելի, իսկ եթե ձեզ հետ 20-ից ավելի մարդ գա՝ դո՞ւք եք ասելու մի եկեք, թե մե՞նք ներս չենք թողնելու, պատկերացնո՞ւմ եք ինչի կարող է վերածվել… Մենք էլ որոշեցինք, հենց գերեզմանոցում  սեղան գցել, հետո քառասունքին, եթե արտակարգ դրությունը հանված լինի, մեծ կկազմակերպենք հոգեհացը կամ տարվա ընթացքում որևէ ծեսի, չգիտեմ»:

Ընդվզում չկար սահմանափակմանը ո՛չ հարազատների, ո՛չ մասնակիցների կողմից: «Ճիշտ որոշում է»,- լսելի էր խմբված մարդկանց կողքով անցնելիս: