12.01.2026 | 11:41
Բազմաթիվ դիեր․ Իրանում բողոքի ցույցերի ընթացքում զոհերի թիվը հասել է առնվազն 544-ի․ ՏԵՍԱՆՅՈՒԹ
Բյուջե 2018-ում հունվարից կանխատեսվող գնաճը մեղմելու մեխանիզմներ չկան.Գագիկ Մակարյան
Տնտեսություն
01.11.2017 | 19:17
Հայաստանի գործատուների հանրապետական միության նախագահ Գագիկ Մակարյանը Factor.am-ի հետ զրույցում ասում է, որ չնայած Բյուջե 2018-ը բավական հիմնավորված է ծախսերի տեսանկյունից, սակայն ՓՄՁ-ների վիճակը Հայաստանում չի լավանում։
«Ծախսերի հիմնավորվածության տեսանկյունից բյուջեն բավական հիմնավոր է հնչում, այլ խնդիր է, որ ՓՄՁ-ների վիճակը Հայաստանում էականորեն չի լավանում։ ՓՄՁ-ների թիվը տարիների ընթացքում էականորեն նվազել է»,- նշեց Մակարյանը։
Նրան խոսքով՝ այսօր ունենք ակտիվ գործող 67 հազարի հասնող ձեռնարկություններ, որոնցից մոտ 54-55 հազարը միկրո ձեռնարկություններ են, իսկ դրանց աշխատողների թվաքանակը նվազել է։ «Սոցիալական խնդիրը, որը պետք է լուծեին այդ ՓՄՁ-ները, չի լուծվում»,- ասաց նա։
Գագիկ Մակարյանը նաև նկատեց, որ բյուջե 2018-ում հունվարից կանխատեսվող գնաճը մեղմելու մեխանիզմներ չկան, և դա սոցիալական հետևանքներ է ունենալու։ «Ռիսկ կա, որ ներմուծումների մասով էլ կարող են գները թանկանալ»,- նշեց փորձագետը։
«Եկող տարվա բյուջեի դիֆիցիտը այս տարվա դեֆիցիտից ավելի է։ Դեֆիցիտը 156 մլրդ է, այս տարվա 150 մլրդ-ի փոխարեն»,- ասաց նա։ Անդրադառնալով Համաշխարհային բանկի Doing business զեկույցին, որով Հայաստանը 9 կետով նահանջ է արձանագրել, Մակարյանը շեշտեց, որ «կառավարության ջանքերն այդքան էլ արդյունավետ չեն», սակայն պատճառներից է նաև այն, որ մյուս երկրները ավելի արագ են ընթանում բարեփոխումների ճանապարհով։
Գագիկ Մակարյանի խոսքերով, այն, որ այս տարվա 8 ամիսների ցուցանիշով Հայաստանից 600 մլն դոլարի արտահոսք է տեղի ունեցել, ցույց է տալիս, որ դեռ շատ անելիք կա Հայաստանի բիզնես միջավայրը բարելավելու ուղղությամբ։ «Կարծում եմ, այս տարի մի 600 միլիոն դոլարի չափով ներդրում կլինի, սակայն վարչապետի խոստացած 850 մլն-ին չենք հասնի»,- կանխատեսեց փորձագետը։
Մանրամասները դիտեք Գագիկ Մակարյանի հետ Factor.am-ի հարցազրույցում։
Մարինե Խառատյան
