Քաղաքականություն
19.02.2020 | 18:10Factor.am-ի հարցազրույցը ՀՀ ԱԺ «Իմ քայլը» խմբակցության պատգամավոր Արմեն Փամբուխչյանի հետ
– Պարո՛ն Փամբուխչյան, կխնդրեմ մի քանի բառով փորձեք համոզել, թե ինչո՞ւ ապրիլի 5-ին մեզ դիտողները պիտի իրենց բան ու գործը թողնեն, գնան ընտրատեղամաս և «Այո» քվեարկեն առաջարկված Սահմանադրական փոփոխությանը:
– Ամենակարևորը՝ պետք է ոչ թե այդպես ներկայացվի, որ իրենք պիտի իրենց բան ու գործը թողնեն, գնան ընտրատեղամաս, այլ, իմ կարծիքով, ընտրության կամ հանրաքվեի մասնակցելը, ընտրատեղամաս գնալը մեր քաղաքացու համար պետք է լինի պատվաբեր գործ, որովհետև ինքն է իշխանության կրողը և ինքը պետք է իր քվեով արտահայտվի՝ համաձա՞յն է երկրի Մայր օրենքի դրույթը կամ այն ամբողջությամբ փոփոխելուն:
Երկրորդ՝ իրենք պետք է հասկանան, որ այս ընտրությամբ իրենք վերականգնում են Սահմանադրության ոգին, որը շրջանցելով՝ նախկին իշխանությունները մեզ տվել են «հավերժ» Սահմանադրական դատարանի կազմ: Եվ երրորդ՝ ՍԴ-ն գործում է այլ տրամաբանության մեջ և չի սպասարկում այն առաքելությունը, ինչի համար կոչված է:
– Խորհրդարանական ընդդիմությունն ասում է՝ հակաիրավական ու հակասահմանադրական քայլերի եք գնում, Հրայր Թովմասյանին հեռացնելը թանկ է նստում բյուջեի վրա: Ձեր գործընկերների պնդումներին ինչպե՞ս կարձագանքեք:
– Մի փոքր ժպտացնող է, երբ ասում են՝ հակաիրավական գործընթաց եք սկսել։ Եթե մենք որևէ օրենքի շուրջ փոփոխություն անեինք, որը պետք է ավարտվեր մեր ուժի քվեարկությամբ կամ կառավարության որոշմամբ, և ասեին, որ դա հակաիրավական գործընթաց է, գուցե ես հասկանայի: Սակայն երբ մենք սկսել ենք մի գործընթաց, որի հանգուցալուծումը հանրաքվեն է, և մեր գործընկերները մեզ մեղադրում են անօրինականության մեջ, դա ծիծաղելի է: Անելանելի իրավիճակում հանրաքվեն ամենաուղիղ, ամենաճիշտ և ամենալեգիտիմ ճանապարհն է։
– Դուք ասում եք՝ լեգիտիմ ճանապարհ է, բայց ՀՅԴ-ն ու ՀՀԿ-ն կոչ են անում բոյկոտել հանրաքվեն, չգնալ ընտրության: Սա ինչպե՞ս կազդի հանրաքվեի արդյունքների վրա։
– Զրոյական ազդեցություն կարող է ունենալ, քանի որ թե՛ ՀՅԴ-ն, թե՛ ՀՀԿ-ն չունեն ժողովրդի վստահության այնպիսի քանակ, որ իրենց խոսքը լինի որոշիչ։ Առնվազն նախորդ ընտրությունները ցույց են տվել, թե որքան քվե են հավաքել նրանք։
– Հետահայաց նայելով՝ արձանագրենք, որ 2018-ի հետհեղափոխական շրջանում «Իմ քայլը» ստացել էր 850 հազար քվե: Հիմա, որպեսզի Սահմանադրական փոփոխությունը հաղթի, անհրաժեշտ է շուրջ 650 հազար «Այո»։ Կկարողանա՞ք առանց վարչական ռեսուրսի կիրառման ապահովել այդ ձայները։
– Մենք 850 հազար քվեն ստանալու ժամանակ էլ ոչ մի վարչական լծակ չենք օգտագործել, հիմա էլ չենք պատրաստվում: Մենք մերժված ՀՀԿ-ն չենք, որ վարչական լծակներ օգտագործենք, մենք գնալու ենք ժողովրդի հետ ուղիղ խոսելու, իրենց քվեն խնդրելու։ Մենք ակնկալում ենք 650 հազարից ավելի ձայներ, քանի որ կարծում ենք՝ ունենք ժողովրդի մեջ այդքան վստահություն և ժողովուրդն այդ քվեն մեզ կտա։
Հարցազրույցն ամբողջությամբ՝ տեսանյութում:
Լիլիթ Շաբոյան
