Վանեցյանը կարող է կարմիր գծեր հատել. Արմեն Բաղդասարյան. ՏԵՍԱՆՅՈՒԹ

Factor.am-ի հարցազրույցը քաղաքագետ Արմեն Բաղդասարյանի հետ

– Պարո՛ն Բաղդասարյան, իշխող «Իմ քայլը» խմբակցությունը մտադիր է փետրվարի 6-ին արտահերթ նիստ հրավիրել: Այսօր հայտնի դարձավ, որ իշխող ուժն առաջարկում է փոփոխություն կատարել Սահմանադրությունում, որով, ըստ էության, կդադարեցվի Սահմանադրական դատարանի նախագահի և անդամների պաշտոնավարումը, ապա դատավորների թափուր տեղերի համար առաջադրումներ կկատարեն Կառավարությունը, հանրապետության նախագահը և դատավորների ընդհանուր ժողովը: Ինչպե՞ս եք վերաբերվում նման լուծմանը։ 

– Սա ինչ-որ լուծում է: Իսկ այն, որ Սահմանադրական դատարանի շուրջ ստեղծված այս իրավիճակը հանգուցալուծում պետք է ունենա, դա միանշանակ է, որովհետև այսպես երկար շարունակվել չի կարող։ Սա լուծման փորձ է։ Ես սա չէի անվանի կտրուկ վերաբերմունք։ Հրայր Թովմասյանի կողմնակիցները հիմա պիտի հայտարարեն՝ սա հակասահմանադրական է, հակաօրինական է, իսկ օրինագիծը ներկայացնողները պիտի հիմնավորեն սա։ Հանրության համար հիմա էլ պարզ է, որ ՍԴ-ն այս կազմով օբյեկտիվ չէ, իսկ մեր պետությունը պետք է ունենա անաչառ դատարան։ ՍԴ-ն քաղաքական դիրքորոշումներ է արտահայտում։

– Ինչո՞ւ իշխանությունը չի հավատում Հրայր Թովմասյանի այն հավաստիացումներին, որ ՍԴ-ի միջոցով իրենց իշխանությանը ոչինչ չի սպառնում, և որ ինքը փակել է քաղաքական գործունեության էջը, որպես մասնագետ է աշխատում և չեզոք է։

– Հասարակությունը չի հավատում ՍԴ-ին շատ պատճառներով՝ Հրայր Թովմասյանը եղել է ՀՀԿ-ական, հեղինակ է Սահմանադրության, որը Սերժ Սարգսյանին հնարավորություն է տվել նախագահական երկրորդ ժամկետից հետո շարունակել միանձնյա երկիրը ղեկավարել: Այսինքն՝ այդ պատվերը կատարել է Հրայր Թովմասյանը, դա քաղաքական պատվեր էր քաղաքական իշխանությունից իջեցված, և դրա դիմաց ստացել է ՍԴ նախագահի պաշտոնը։ Սա հասարակությունն ընկալում է գործարք՝ ՀՀ նախկին իշխանությունների և ներկա իշխանությունների միջև։ Այդպիսի գործարք կատարած մարդը, առավել ևս, և կարծեմ, քրեական գործ կա հարուցված, որ ՍԴ նախագահ է ընտրվել կասկածելի մեխանիզմներով, հասկանալի է, որ հասարակության վստահությանն արժանանալ չի կարող։

– Դատական համակարգը նախկին իշխանության վերջին բաստիոնն է։ Ամբողջովին զավթված ՀՀ-ն ազատագրում ենք, այսպես է հիմնավորում իր քայլերը իշխանությունը։ Ձեր կարծիքով՝ օբյեկտի՞վ է նման գնահատականը։

– Նախկինների վերջին բաստիոնը դատական իշխանությունը չէ։ Նախկինները շատ լուրջ աջակցություն ունեն նաև ուժային կառույցներում, բանկային կառույցներում, հեռարձակման ոլորտում։ Բոլոր տեղերում էլ նախկինները ներկայացված են, և սա շատ լուրջ պրոբլեմ է, իշխանությունը պետք է հաշվի նստեն սրա հետ։

– Հնարավո՞ր է Հայաստանի դեմ միջազգային կառույցները նոր հայտարարություններ և բանաձևեր ընդունվեն՝ դրանից բխող բացասական հետևանքներով։

– Այո՛, հնարավոր համարում եմ բացասական գնահատականները և հայտարարությունները, բայց պետք է ծանրութեթև անել, հասկանալ, թե որն է հասարակությանն ու պետությանը ձեռնտու։

– Վանեցյանը պատրաստվում է հարցազրույց տալ որոշ լրատվամիջոցների ներկայացուցիչների և հայտարարել քաղաքական դաշտ մտնելու մասին։ Կարեն Անդրեասյանն ասում էր՝ պետք է հասկանալ, թե ռուսաստանյան շրջանակներն ինչ հավակնություններ ունեն։ Ի՞նչ զարգացման սպասել։ 

– Վանեցյանն արդեն քաղաքականության մեջ է, անկախ նրանից՝ այդ մասին կհայտարարի, թե՝ ոչ։ Ռուսական տնտեսական շրջանակները միշտ էլ ցանկացել են ազդեցություն ունենալ և միշտ էլ ունեցել են ու կցանկանան առարկայացնել դա։ Ինչ մնում է նրան, որ հատուկ ծառայությունների ղեկավարները մտնում են քաղաքականություն, դա վտանգ է պարունակում, որովհետև մարդը տիրապետում է պետական գաղտնիքի և անթույլատրելի է, որ դա օգտագործի։

– Վանեցյանը հատե՞լ է կարմիր գծերը։

– Չի հատել, բայց մեծ հավանականություն կա, որ կհատի, որովհետև նա քաղաքական դաշտում խաղարկելու որևէ խաղաքարտ չունի։ Նա տիրապետում է ինֆորմացիայի: Դա նրա միակ խաղաքարտն է, հասարակությունը նրան չի ճանաչում քաղաքական գործիչ։ Նա ուրիշ ասելիք չունի։

– Այսինքն՝ իրականության մեջ դա ինչպե՞ս է արտահայտվելու, օրինակ՝ Նիկոլ Փաշինյանի իշխանության գաղտնիքնե՞րն է հրապարակելու։

– Հույս ունեմ՝ չի անի, բայց կարող է անել այդպես, նա տիրապետում է պետական գաղտնիքներ պարունակող բազմաթիվ տեղեկությունների, այդ թվում՝ օտարեկրյա ազդեցությունների վրա փորձելով ներազդել: Հնարավոր է՝ շատ վտանգավոր լինի։

– Երեկ ոստիկանություն բերման էր ենթարկվել ՀՀԿ-ական նախկին պատգամավոր Ռուբեն Հայրապետյանը։ Ասում է՝ Նիկոլ Փաշինյանի հրահանգով են բերման ենթարկում իրեն, ՀՀԿ-ականները քաղաքական հետապնդում են դա համարում: Հայրապետյանը նշում է. «Ասում է՝ ամոթ չէ ոստիկանի կողմից ասֆալտին պառկելը, բայց որ ես եմ մի գեղեցիկ օր պառկեցնելու և ոտքերս մաքրեմ իրենց վրա, հաստատ լինելու է»։

– Անընդունելի է այդ բառապաշարը լեգիտիմ իշխանության նկատմամբ և, ընդհանրապես, բռնության կոչերն անընդունելի են, նաև իմքայլական պատգամավորներից մեկն էր ասել, որ եթե Նիկոլ Փաշինյանը չխանգարեր, ժողովուրդն իրենց ոտնատակ կտար։ Պետք է հստակ բացատրություն տան՝ ինչու են բերման ենթարկում, մի քանի օր առաջ էլ ընդդիմադիրների էին բերման ենթարկել, հետո ազատ արձակել: Չէ՞ որ ոստիկանության նկատմամբ հասարակության վերաբերմունքն է փոխվում։ Ընդդիմությունը դա օգտագործում է քաղաքական նպատակներով, ինչն ազդում է իշխանության վարկանիշի վրա։

Հարցազրույցն ամբողջությամբ՝ տեսանյութում:

Ռոբերտ Անանյան