10.01.2025 | 23:14
ՊԵԿ նախագահն ընդունել է Հնդկաստանի դեսպանին
«Սառույցը շարժվեց». ի՞նչ են քննարկել Վրաստանի իշխանության ու ընդդիմության ներկայացուցիչները
Քաղաքականություն
09.12.2019 | 13:25
Նախօրեին` դեկտեմբերի 8-ին տեղի է ունեցել Վրաստանի իշխանության և ընդդիմության ներկայացուցիչների` դիվանագետների մասնակցությամբ թվով երկրորդ հանդիպումը: Քննարկման հիմնական թեման եղել է ընտրական համակարգը. գրում է aliq.ge-ն:
Հանդիպումից հետո կողմերը լրագրողների հետ զրույցում տարբեր կերպ են ներկայացրել իրավիճակը: Այսպես, խորհրդարանի նախկին խոսնակ Իրակլի Կոբախիձեի խոսքով, միավորված ընդդիմությունն այս անգամ հանդես է եկել բացարձակ նոր առաջարկով, որը տարբերվում է նախորդ պահանջներից:
«Ընդդիմությունն առաջարկում է մեկ մանդատ ունեցող մեծամասնական վարչությունները փոխարինել մի քանի մանդատ ունեցողներով: Այս նախաձեռնությունը սահմանադրական փոփոխություններ չի պահանջում: Մեր թիմը պետք է քննարկումներ անցկացնի ու որոշում կայացնի», — ասել է Կոբախիձեն:
«Նոր Վրաստան» ընդդիմադիր քաղաքական հարթակի ղեկավար Գիորգի Վաշաձեն ասում է` «սառույցը շարժվեց, սակայն ընդդիմության ու հանրության վստահությունն իշխող կուսակցության հանդեպ զրոյական է»։
«Բանակցությունների երկրորդ փուլը կարևոր ձեռքբերում է մեր խաղաղ, ոչ բռնի ընդվզումների և դիվանագիտական կողմի ճնշումների տեսանկյունից» — նշում է Վաշաձեն:
Վաշաձեն ավելացրել է՝ «Վրացական երազանքը» սպառել է իրեն, ժամանակն է ճանապարհել նրանց իշխանությունից:
Ընդդիմադիր «Միավորված ազգային շարժում» կուսակցության առաջնորդ Գրիգոլ Վաշաձեն ասել է` «ոչ մի տեսակի պայմանավորվածություն չի եղել, եղել է համաձայնություն: Մեր մասնագիտության մեջ առաջին կուրսից սովորեցնում են` պատրաստ եղիր ավատին, հույս ունեցիր, որ ավելի լավ կլինի, ես այդ «ավելի լավի» հույսն էլ չունեմ», — ասել է Վաշաձեն:
Ինչ վերաբերում է դիվանագիտական կողմին` Վրաստանում ԱՄՆ-ի դեսպանի ժամանակավոր պաշտոնակատար Էլիզաբեթ Ռուդը հանդիպման ավարտից հետո լրագրողների հետ զրույցում ասել է․
«Դրական ու քննադատական երկխոսությունը պահպանելու համար յուրաքանչյուր անձ և քաղաքական կուսակցություն, որն ուզում է արտահայտել կարծիքը, պետք է դա անի օրենքի շրջանակներում»:
Ռուդի գնահատմամբ, հանդիպումը կայացել է կառուցողական միջավայրում, պայմանավորվել են, որ կհանդիպեն ևս մեկ անգամ: Նա հույս է հայտնել, որ հաջորդ հանդիպմանը կքննարկվի մեծամասնական պատգամավորների բաշխման կարգը խորհրդարանում:
Հիշեցնենք՝ հունիսի 20-ի իրադարձություններից հետո իշխող կուսակցության հիմնադիր Բիձինա Իվանիշվիլին բավարարելով ցուցարարների պահանջներից մեկը, խոստացել էր համամասնական ընտրակարգի անցնել արդեն 2020 թվականից: Շուրջ 3 ամիս ընթացող քննարկումներից հետո խորհրդարանը տապալեց սահմանադրական փոփոխությունների վերաբերյալ նախագիծը, ինչից հետո ցույցեր վերսկսեցին, ավելի քան 20 ընդդիմադիր ուժ միավորվեց՝ ընդդեմ իշխանության:
Ընդդիմությունն այս պահին պահանջում է համամասնական ընտրություններ 2020 թվականից, սակայն հաշվի առնելով նաև, որ իշխող կուսակցությունը դեմ է պահանջին, առաջարկում է նաև քննարկել գերմանական մոդելը: Ի դեպ, վերջերս կայացած ներկուսակցական հանդիպման ընթացքում իշխող կուսակցությունը քննարկել էր ամերիկյան մոդելը:
