20.04.2026 | 14:22
Տիմո Վերներն առաջին գոլն է խփել 2024թ․ հոկտեմբերից հետո․ ՏԵՍԱՆՅՈՒԹ
Առաջիկայում կմեկնարկի «Հայաստանի ստարտափ ակադեմիա» նախաաքսելերացիոն ծրագիրը, որը ներառում է ոչ միայն ՏՏ, այլև High-Tech ինդուստրիայի Start-up
Տնտեսություն
03.10.2017 | 18:52
«Նովոստի-Արմենիա» մամուլի կենտրոնում հոկտեմբերի 3-ին կայացել է «Հայաստանի ստարտափ ակադեմիա» նախաաքսելերացիոն ծրագրի մեկնարկին նվիրված մամուլի ասուլիսը։
Ասուլիսի բանախոսներն էին` ՀՀ տնտեսական զարգացման և ներդրումների նախարարի տեղակալ Էմիլ Տարասյանը, ԳՄՀԸ /GIZ հայաստանյան գրասենյակի ղեկավար Աննե Քեմպան, Հայաստանում ԵՄ պատվիրակության համագործակցության բաժնի ղեկավար Հոա Բին Աջեմյանը, Հայաստանում ԵՄ պատվիրակության Միջազգային օգնության/համագործակցության պատասխանատու Ստանիսլավ Տոշկովը, «Աջակցություն ՓՄՁ զարգացմանը Հայաստանում» ծրագրի (ԵՄ, ԳՄՀԸ /GIZ) թիմի ղեկավար Էվա Նաեհերը, Աջակցություն ՓՄՁ Զարգացմանը Հայաստանում ծրագրի (ԵՄ, ԳՄՀԸ /GIZ) թիմի փորձագետ Պիեռ Պրիերվիխը, «Քաթըլիսթ» հիմնադրամի համահիմնադիր, SmartGateVC-ի գործընկեր Համբարձում Քաղկեցյանը և «Քաթըլիսթ» հիմնադրամի համահիմնադիր, SmartGateVC-ի գործընկեր Աշոտ Արզումանյանը։
«Այսօր մեկնարկում է Start-up Academia աքսելերացիոն ծրագիրը, որը ներառում է ոչ միայն տեղեկատվական տեխնոլոգիաների ոլորտի աքսելերացիոն ծրագիր, այլև High-Tech ինդուստրիայի Start-up։ Այս ծրագրիը կլինի մեկնարկային, որը հաջողության դեպքում կլինի նաև մշտական։ Ընտրվել է աքսելերացիոն ծրագրերի համաշխարհային փորձի լավագույն մեթոդաբանությունը։ Այն հնարավորություն կտա նվազեցնել անհաջողությունների թիվը ստարտափերի շուկայում և բարձրացնել հաջողության տոկոսը, ինչը էապես կազդի տնտեսության մեջ ստարտափերի կիրառելիության բարձրացման վրա։ Ստարտափերին հնարավորություն կտրվի լուրջ հմտություններ ձեռք բերել ներդրումների ներգրավման ոլորտում, այն հնարավորություն կտա ներդրողին ներդրում կատարել մի ստարտափում, որը նախկինում կիրառելի չի եղել։
Ցանկանում եմ շնորհակալություն հայտնել Հայաստանում ԵՄ պատվիրակությանը և GIZ կազմակերպությանը, որը ՓՄՁ ձեռնարկությունների աջակցման ծրագրի ներքո համաձայնեց ֆինանսավորել այս պիլոտային ծրագիրը։ Ծրագրի իրականացմանն աջակցում է նաև Հայաստանի կառավարությունը և ակադեմիայի ստեղծման գաղափարը կառավարության օրակարգում է», – իր խոսքում նշել է ՀՀ տնտեսական զարգացման և ներդրումների նախարարի տեղակալ Էմիլ Տարասյանը։
«Հայաստանի ստարտափ ակադեմիա» նախաաքսելերացիոն ծրագիրը կմեկնարկի 2017թ. հոկտեմբերի 16-ին:
Ծրագրի նպատակն է ձևավորել ձեռնարկատիրական կրթության բնագավառում բարձր ստանդարտներ և զարգացնել ստարտափ մշակույթը Հայաստանում: Ծրագրի շրջանակներում նախատեսվում է բարելավել տեխնոլոգիական ընկերությունների հմտությունները, որպեսզի նրանք կարողանան ճշգրիտ կողմնորոշվել և առաջարկել այնպիսի արտադրանք, որը առավելագույնս պահանջված կլինի հաճախորդների կողմից:
Հայաստանի ստարտափ ակադեմիան «Քաթըլիսթ» հիմնադրամի նախագծերից է, որն իրականացվում է Եվրոպական միության և Գերմանիայի Դաշնային Հանրապետության տնտեսական համագործակցության և զարգացման նախարարության կողմից համաֆինանսավորվող «Աջակցություն ՓՄՁ զարգացմանը Հայաստանում» ծրագրի շրջանակներում: «Աջակցություն ՓՄՁ զարգացմանը Հայաստանում» ծրագիրը հանդիսանում է Եվրոպական միության «ԵՄ-ն՝ բիզնեսի համար» և «ԵՄ-ն՝ նորարարության համար» նախաձեռնությունների մաս:
Ակադեմիայի մեկնարկին կնախորդեն դիմորդների ընտրության և հարցազրույցի փուլերը: Առաջին փուլի համար կընտրվեն մինչև 15 ստարտափներ, որոնց հետ մի քանի շաբաթ աշխատանք կտարվի: Ակադեմիան կառաջարկի ինովացիոն մեթոդներ և առարկաներ։ Մի շարք բարձրակարգ մենթորներ կհեշտացնեն ստարտափների հաջողության հասնելու ճանապարհը:
Բացի առաջադեմ ուսումնական ծրագրի դասավանդումից, ակադեմիայի մասնագետները կկատարեն թիմերի ներկա վիճակի և հիմնական պահանջների գնահատում, որից հետո կձևավորվի լիովին անհատականացված զարգացման ծրագիր: Տեղական և արտասահմանյան խոսնակները կհրավիրվեն դասընթացներին, ինչպես նաև խորհուրդներ կտան թիմերին՝ հետևելով նրանց նախագծերի զարգացմանը: Արդյունքում թիմերը հնարավորություն կունենան ձեռք բերել պրակտիկ գիտելիքներ բոլոր այն ոլորտներից, որոնք վճռական դեր ունեն ստարտափների ապագա աճի, հաճախորդների և ծառայությունների զարգացման համար:
Ծրագիրը ներառում է շաբաթական քննարկումներ, գնահատումներ և պարբերական պրեզենտացիոն հանդիպումներ, որոնց արդյունքում կգնահատվի թիմերի առաջընթացը և, ըստ անհրաժեշտության, կկատարվի ծրագրի փոփոխություն: Լավագույն թիմերի համար զգալիորեն կբարձրանա ներդրումներ ստանալու և միջազգային աքսելերացիոն ծրագրերում ներգրավվելու հավանականությունը։
