18.09.2026 | 07:58
Փաշինյանն աշխատանքային այցով մեկնել է Գերմանիա․ նրան կշնորհվի Հեսսեյան Խաղաղության մրցանակը
WCIT 2019 Երևանում. Աշխարհում բարձր տեխնոլոգիաների ոլորտի վերնախավը կայցելի Հայաստան
14.08.2019 | 10:14
«Աշխարհը Հայաստան է գալիս», այսպես է բնորոշում հոկտեմբերի 6-9 Երևանում կայանալիք WCIT՝ տեղեկատվական տեխնոլոգիաների համաշխարհային կոնգրեսի համաժողովը, բիզնես ռազմավարության մասնագետ, ձեռնարկատեր Էմմա Առաքելյանը, ով Նյու Յորքում աշխատանքային խմբի կազմում օգնում է կազմակերպել համաժողովը, հաղորդում է «Ամերիկայի ձայնը»:
«Այս կոնգրեսի կազմում են համաշխարհային տեղեկատվական տեխնոլոգիաներով զբաղվող ընկերությունների 90 տոկոսը՝ բոլոր խոշոր խաղացողները: Մենք էլ ամեն ինչ անում ենք, որպեսզի նրանք բոլորը Հայաստան այցելեն»,- նշում է Էմմա Առաքելյանը:
Նրա խոսքով, նախկինում այս կոնգրեսը կազմակերպվել է համաշխարհային բարձր տեխնոլոգիաների մայրաքաղաքներում՝ Սան Ֆրանցիսկոյում, Տոկիոյում, Փարիզում: Հայաստանում կոնգրեսի անցկացումը կարևոր խորհրդանիշ է: Աշխատանքային խմբի անդամ, Նյու Յորքում գործող փաստաբան Արմեն Մորիանն ընդգծում է՝ հոկտեմբերին Հայաստան են ժամանելու բարձր տեխնոլոգիաների ոլորտով զբաղվող տիեզերական, ռազմական, առողջապահական, բանկային և այլ ոլորտների խոշոր ներկայացուցիչներ:
«Մենք ունենք անհավատալի պատմություն աշխարհին ներկայացնելու: Մենք պարզապես մի երկիր չենք, որը շահել է այս համաժողովն իր մոտ անցկացնելու իրավունքը: Մենք ունենք 6000 տարվա պատմություն, պատմություն, որտեղ մենք քաղաքակրթության արշալույսից ի վեր եղել ենք նորարար ժողովուրդ՝ մարդկության զարգացման յուրաքանչյուր ոլորտում»:
Նոր տեխնոլոգիաներն իրենց հետ սակայն ոչ միայն լուծումներ այլև՝ նոր վտանգներ են բերում, նշում է գլոբալ կրթության ոլորտի առաջատար Դեբորա Դևեջյանը: Հենց այստեղ Հայաստանը կարող է աշխարհին առաջարկել էթիկական խնդիրների լուծման իր տեսլականը:
«Տեխնոլոգիան հսկայական առաջընթաց է գրանցել բազմաթիվ ոլորտներում՝ գենետիկա, ռոբոտայնացում, կլոնավորում, գեների փոփոխումը: Այս տեխնոլոգիաները խոստանում են լուծումներ բացմաթիվ խնդիրների, սակայն, կրում են նոր վտանգներ, որոնց մասին պետք է խորհել արդեն այս պահին»,- ասում է Դևեջյանը:
Աշխատանքային խմբի անդամների խոսքով, Հայաստանի «Թավշյա հեղափոխությունը», որը արմատապես փոխեց իրավիճակը երկրում, մեծապես նպաստեց նաև Երևանում Տեղեկատվական տեխնոլոգիաների համաշխարհային կոնգրեսի նոր որակով կազմակերպմանը:
«Համոզված չեմ, որ եթե մենք զրուցեինք մինչև «Թավշյա հեղափոխությունը», այս համաժողովի մասնակիցների նույնիսկ կեսը ցանկություն հայտներ մասնակցել դրան, որովհետև, գիտեք, կոռումպացված երկրի պիտակը չի նպաստում տեղեկատվական տեխնոլոգիաների զարգացմանը», – նշում է Էմմա Առաքելյանը:
