Քաղաքականություն
01.08.2019 | 18:00Factor.am-ի հարցազրույցը «Իրավունքի Եվրոպա» միավորման նախագահ, փաստաբան Լուսինե Հակոբյանի հետ
– Ինչպե՞ս կգնահատեք դատավոր Դավիթ Գրիգորյանի շուրջ ստեղծված իրավիճակը, նրան մեղադրանք է առաջադրվել, լիազորությունները կասեցված են։
– Այս պահի դրությամբ ես որևէ արտառոց բան չեմ տեսնում այդ գործընթացի հետ կապված, այդ ամբողջը եղել է Բարձրագույն դատական խորհրդի գիտությամբ և հավանությամբ, իսկ ԲԴԽ կազմում ոչ միայն ԱԺ-ի կողմից ընտրված անդամներ են, այլ նաև Դատավորների ընդհանուր ժողովի կողմից ընտրված անդամներ։ Նրանք որևէ առարկություն չեն ունեցել, ուստի ավելորդ աղմուկ բարձրացնելն այս գործի հետ կապված անիմաստ է և անհիմն։
– Այդուհանդերձ, Դավիթ Գրիգորյանի գործի հետ կապված փաստաբանական համայնքը բաժանվել է երկու մասի…
– Ես չէի շտապի փաստաբանական համայնք կոչել և ասել, որ երկու մասի է բաժանվել, որովհետև փաստաբանական համայնքը բավական մեծ է՝ շուրջ 3.000 փաստաբան: Հիմա ես տեսնում եմ, որ մոտ 100 փաստաբան ինչ-որ ակցիա են արել այդ դատավորի շահերի պաշտպանության հետ կապված, և այդ ցանկի առաջին տեղերում հասկանալի է, թե ովքեր են։
– Ովքե՞ր։
– Նախկին ռեժիմի ներկայացուցիչներ, որոնք շատ կոնկրետ գիծ ունեն, և այդ գիծը ենթադրում է, որ այն ամենը, ինչ տեղի է ունենում այսօր, ապօրինի է, անօրինական, ցանկացած անձի նկատմամբ քրեական հետապնդումը քաղաքական հետապնդում է, հալածանք… Այսինքն՝ փորձ է արվում տպավորություն ստեղծել, որ Հայաստանը ներկայումս ինչ-որ բռնատիրության ռեժիմի մեջ է, նախկին քաղաքական գործիչներին և նրանց գործերը քննող դատավորներին էլ ենթարկում են քրեական հետապնդումների: Մի խումբ էլ, որ ունի բավական մեծ սուբյեկտիվություն այդ գործի հետ կապված, որովհետև բազմիցս հայտարարել են՝ իրենց ուսուցչի պաշտպանյալն է այս գործով անցնում, խոսքը Ռուբեն Սահակյանի մասին է և մի քանի փաստաբանների, որոնք իրենց համարում են Ռուբեն Սահակյանի աշակերտները։ Եվ, ցավոք, կան երիտասարդ փաստաբաններ, որոնք մոլորության մեջ են և չեն պատկերացնում՝ ինչ է կատարվում։
– Դատավորի պաշտպանը նշում է, որ այդ ամենն ուղիղ կապ ունի Քոչարյանի գործով նրա կայացրած որոշումների հետ։ Դուք կապ տեսնո՞ւմ եք։
– Եթե նկատի ունեք, որ այս գործընթացը պայմանվորված է նրանով, որ Դավիթ Գրիգորյանը կայացրել է որոշումներ, որոնց արդյունքում փոխվել է Ռոբերտ Քոչարյանի խափանման միջոցը, ապա ես կհիշեցնեմ, որ նմանատիպ որոշում կայացրել է Ալեքսանդր Ազարյանը, սակայն, ինչպես տեսաք, նրան նկատմամբ քրեական հետապնդում չիրականացվեց։
– Հեղափոխությունից հետո իսկապես դատական իշխանության գործունեությանը գործադիր և օրենսդիր իշխանության կողմից միջամտություն չի՞ եղել։
– Ես կարծում եմ՝ այն կոնցեպտը, որը որդեգրվեց հետհեղափոխական ժամանակահատվածում, անընդունելի էր: Անընդունելի էր հուսալ, որ դատավորները կինքնամաքրվեն։ Պետության նկատմամբ այդպիսի փորձարկումներ չէր կարելի անել, որովհետև առանց այն էլ բավական երկար ժամանակ ենք կորցրել: Հուսալ, որ անձինք իրենք իրենցով ճիշտ ուղով կգնան, միամտություն էր:
Հարցազրույցն ամբողջությամբ՝ տեսանյութում:
Շողիկ Գալստյան
